Qańtardyń qandy qyrǵyny
Ómirdiń boldy shyndyǵy!
Baq pen sor degen bir demde-
Oılaǵan deısiń kim muny?!.
Aryz da aıtar kóp tegi,
Nege olar tynysh ketpedi?!.
Otyz jyl aıtqan odamyz
Otyz saǵatqa jetpedi!?.
Otyz jyl ultqa ógeısiń,
Otyzdyq qaıda,- kedeısiń!
Aırylǵan jalǵyz ulynan
Áke-sheshege ne deısiń?!.
Qoıǵanyń qaıda kópshikti?
Al sodan qaıda shóp shyqty?!
Qanshama jandy óksitti -
Murtsyz saqaldar deýshi edik,
Ultsyz “nahaldar” bop shyqty!
Qaıda álgi sansyz jıyndar?
Ornady nege qıyn hal?!.
Qaýipsizdigimdi qorǵaıtyn
Qaýipti boldy uıymdar!
Túsinbes eldi baılar túk,
Elime qonsyn qaıdan qut?!.
Altyndy basyp otyryp,
Jalańaıaqqa aınaldyq!
Qul bolyp,qoja tiline,
Jat bolyp júrmiz kúnige.
Atańnyń atyn aıta almas,
Ultsyzdyq jeter túbińe!
Alladan bári ornaıdy -
Azattyq basqa qondy áıgi.
Qamytty kimder qoldaıdy?!.
Halyqty bilmes, sol qaıǵy!
Til joqta - Diliń joq bolar,
Dil joqta dymyń bolmaıdy!
Kókjıek qaıda kóp barar,
Kókezý sózdi tókti olar.
Ultshyldyq eger joq bolsa,
Ultyń da túbi joq bolar!
Halyqty degen tonaıyq,
Bılikte boldy kóp aıyp.
Táýelsiz boldyq endi biz,
Táýbe dep, atqa qonaıyq!
"Adyrna" ulttyq portaly.
