دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس قازاقتىڭ بەلگىلى اقىنى، ايتىس جاناشىرى ءجۇرسىن ەرماندى مەرەيتويىمەن قۇتتىقتاپ، ءبىر اۋىز ولەڭىن جاتقا وقىدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە جاساپ.
دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس گەبرەيەسۋس Facebook -تەگى پاراقشاسىندا ەرەكشە جازبا جاريالادى.«Congratulations Zhursin Yerman Kuda! قۇتتى بولسىن، ءجۇرسىن ەرمان قۇدا!» دەپ باستالاتىن جازبانىڭ استىندا قازاقي شاپان مەن بورىك كيگەن ددسۇ باسشىسىنىڭ ءجۇرسىن ەرماندى مەرەيتويىمەن قازاق تىلىندە قۇتتىقتاعان ۆيدەوسى سالىنعان.
- قۇرمەتتى ءجۇرسىن قۇدا! مەرەيتويىڭىز قۇتتى بولسىن! دەنساۋلىعىڭىز زور بولسىن! ءومىر ۇزاق بولسىن! قۇدالىعىمىز ماڭگىلىك بولسىن!
ارباسا ءناپسى-ىبىلىس،
الاڭداي بەرەم ۇلىپ ءىش.
كوڭىلگە نەگە سىيمايسىڭ
كوزىمە سىيعان قۇبىلىس؟!، - دەيدى تەدروس گەبرەيەسۋس.
دۇنيەجۇزىلىك دەنساۋلىق ۇيىمى باسشىسىنىڭ ءجۇرسىن ەرمانعا «قۇرمەتتى قۇدا» دەپ قايىرىلۋىنىڭ سەبەبىن ءبىلۋ ءۇشىن بيىل 70-كە تولعان اقىننىڭ وزىنە حابارلاستىق.
- مەنىڭ ءبىر جيەنىم تەدروس گەبرەيەسۋستىڭ ۇلىنا تۇرمىسقا شىققان. ءوزىم جيەن قىزىم دەيمىن، كىشى قىزىمنىڭ قىزى عوي ەندى. قازىر ول جيەنىم جەنەۆادا تۇرادى. تەدروس گەبرەيەسۋسكە مەنىڭ ولەڭىمدى جاتتاتقىزىپ، قازاقشا ۇيرەتىپ جۇرگەن سول جيەن قىزىم عوي، - دەپ قىسقا قايىردى ءجۇرسىن ەرمان.
ايتا كەتەيىك، تەدروس گەبرەيەسۋس دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى قىزمەتىنە 2017 جىلى كىرىسكەن بولاتىن. ال 2012-2016 جىلدارى ەفيوپيانىڭ دەنساۋلىق ساقتاۋ ءمينيسترى رەتىندە قىزمەت ەتكەن.
"ادىرنا" ۇلتتىق پورتالى
