قۇرمەتتى وتانداستارىمدى ەشقاشان جانە ەشۋاقىتتا مەشىت پەن مەدرەسەلەرگە اقشا-قاراجات بەرمەۋگە شاقىرامىن! بيىلعى ورازادا رەسمي ءمۇفتيات ءپىتىر-ساداقا جان باسىنا 420 تەڭگە دەپ بەلگىلەپ وتىر. ەگەر دە ورتا ەسەپپەن 7-ميلليونداي قازاقستاندىق ارقايسىسى 420 تەڭگەدەي كومەكتى مۇقتاج جاندارعا اقشالاي ياكي ازىق-تۇلىك تۇرىندە بەرسە،شامامەن بۇل سوما 3 ميلليارد 640 ميلليون تەڭگەنى قۇرايدى ەكەن.جاراتۋشى-ءتاڭىردىڭ شىنايى رازىلىعىن ىزدەسەڭىزدەر،قايىرىمدى ءىس-ارەكەتتەرىڭىزبەن كوپ بالالى انالارعا،قارىزعا بەلشەسىنەن باتقان ازاماتتار،قحر-ءدىڭ گەنوتسيد ساياساتىنىڭ قۇربانى بولعان ءتىرى جەتىم-جەسىرلەر مەن ەلىمىزدەگى جۇزدەگەن ساياسي تۇتقىنداردىڭ وتباسىنا كومەكتەسۋلەرىڭىزدى ءوتىنىپ سۇرايمىن.
- كەدەي-كەپشىك، جەتىم-جەسىرلەر جانە كۇنكورىسى قيىنداپ كەتكەن وتباسى مۇشەلەرىنە ءپىتىر-ساداقا بەرۋ مىندەت ەمەس. قايتا اشىعىپ وتىرعان بالا-شاعاسىنىڭ اۋزىنان جىرىپ الىپ باسقاعا كومەكتەسۋ قۇران ىلىمىنە، مۇسىلماندىققا قايشى.
- باي، داۋلەتتى ازاماتتار ءپىتىر-ساداقاسىن مەشىتكە ەمەس، اشىققان وتباسىلارعا بەرگەنى جانە كومەكتىڭ كولەمى 420 تەڭگەمەن شەكتەلمەگەنى ءجون. ميللياردەرلەر ميلليونداعان سوماداعى ساداقا بەرۋىنە بولادى، شەكتەۋ جوق.
- قۇران ءىلىمى بويىنشا، ءپىتىر-ساداقا ورازا جانە قۇربان ايت كەزىندە عانا تارتىلمايدى، ونىڭ مەرزىم ارالىعى كورسەتىلمەگەن، يگى شارانى ءدال قازىر، كەز كەلگەن ۋاقىتتا باستاي بەرسە دە بولادى.
- ءپىتىر-ساداقا ازىق-تۇلىك تۇرىندە تاراتىلماعانى، ءاربىر وتباسىنىڭ ەسەپشوتىنا اقشا تۇرىندە اۋدارىلعانى ءجون. بۇل ادامداردىڭ ءبىر جەرگە توپتاسۋىنا، كوروناۆيرۋس ىندەتىنىڭ جايىلۋىنا كەدەرگى بولادى.
قوعام بەلسەندىلەرى مەن جۋرناليستەر وزدەرىنىڭ الەۋمەتتىك جەلىدەگى پاراقشاسىندا جەتىم-جەسىر، كەدەي-كەپشىكتىڭ مالىمەتىن جاريالاپ، ولارعا اقشالاي بەرىلەتىن ءپىتىر-ساداقانى جەتكىزۋگە كومەك كورسەتسە، يگى ءىس بولار ەدى. وسى ىزگى امالدى، يگى باستامانى قوعام بولىپ قولداپ جۇزەگە اسىرساق، حالقىمىزدىڭ باسىنا تۇسكەن قيىن كەزەڭدى جەڭىلدىكپەن ەڭسەرىپ شىعامىز. سوندا عانا ورتاعاسىرلىق دۇمشە داستۇردەن ارىلىپ، ۇلى جاراتۋشىنىڭ كورسەتكەن جولىنا تۇسەمىز...
