بۇگىن ۇكىمەت وتىرىسىندا پرەمەر-مينيستر اسقار مامين قازاقستاننىڭ سوڭعى ون ايداعى الەۋمەتتىك-ەكونوميكالىق دامۋى تۋرالى مينيسترلەر مەن اكىمدەردىڭ باياندامالارىن تىڭدادى.
ۇلتتىق ەكونوميكا ءمينيسترى رۋسلان دالەنوۆ ەلدەگى ينفلياتسيا، ياعني، قىمباتشىلىق الدىڭعى ايلارمەن سالىستىرعاندا ۇلعايىپ، 7,1% جەتكەنىن حابارلادى.
ۇلتتىق بانك توراعاسى ەربولات دوساەۆ ۇلتتىق ۆاليۋتامىز ءبىر ايدا 0,2% قۇنسىزدانىپ، الدىڭعى ايدا ءبىر دوللار 431,81 تەڭگە بولسا، قازاندا 432,66 تەڭگەگە ساتىلعانىن حابارلادى. دوساەۆ تەڭگەنىڭ قۇنسىزدانۋىن مۇناي باعاسى مەن وتكەن اپتادا وتكەن اقش پرەزيدەنتىنىڭ سايلاۋىمەن بايلانىستىردى.
ال، بيۋدجەتتىڭ كىرىس-شىعىسى تۋرالى بايانداما جاساعان قارجى ءمينيسترى ەرۇلان جاماۋباەۆ ون اي بويى بيۋدجەتتەن العان اقشاسىن دۇرىس يگەرە الماعان مينيسترلەر مەن اكىمدەر تۋرالى اقپارات بەردى. ەڭ قىزىعى، جاماۋباەۆ قارجىنى دۇرىس يگەرمەي وتىرعان ەڭ ءبىرىنشى مەمورگان رەتىندە ءوزى باسقارىپ وتىرعان قارجى مينيسترلىگىن اتادى.
«ون ايدا رەسپۋبليكالىق بيۋدجەتتىڭ شىعىستارى 11 ترلن. 284ملرد. تەڭگەنى قۇرادى. 32 ملرد. تەڭگە اتقارىلماعان. ونىڭ ىشىندە ۇنەمدەۋ–8 ملرد. تەڭگە، يگەرىلمەگەنى –24 ملرد. تەڭگە. قارجىنى يگەرمەۋدىڭ نەعۇرلىم ءىرى سوماسى مىناداي ورتالىق مەملەكەتتىك ورگانداردا قالىپتاستى، ولار - قارجى مينيسترلىگى – 2 ملرد.تەڭگە، اۋىل شارۋاشىلىعى مينيسترلىگى – 1,9 ملرد.تەڭگە، ادىلەت مينيسترلىگى – 1,6 ملرد.تەڭگە، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى –1,2 ملرد.تەڭگە، ەكولوگيا، گەولوگيا جانە تابيعي رەسۋرستار مينيسترلىگى –1,1 ملرد.تەڭگە»، - دەيدى جاماۋباەۆ.
وسىلايشا، ءوزىن-ءوزى «سىنعا العان» ەرۇلان جاماۋباەۆ قارجىنى يگەرمەۋدىڭ نەگىزگى سەبەپتەرى رەتىندە كونكۋرستىق راسىمدەردى، شارتتاردى جاساسۋ راسىمدەرىن ۇزاق سوزۋ، ورىندالعان جۇمىستار اكتىلەرىن ۇسىنباۋ، سوتتا مەملەكەتتىڭ مۇددەسىن قورعاۋ جونىندەگى تالاپ-ارىز جۇمىستارىنىڭ ءجۇرۋى، ناقتى كورسەتىلگەن قىزمەتتەر كولەمى، ورىندالعان جۇمىستار ءۇشىن اقى تولەۋدىڭ ۇزاققا سوزىلاۋ سياقتى فاكتورلاردى اتادى.
«ال، جەرگىلىكتى بيۋدجەتتەردىڭ شىعىستارى 6,4 ترلن. تەڭگەنى قۇرادى. اتقارىلماعانى -128 ملرد. تەڭگە. بيىل وڭىرلەرگە 2,3 ترلن.تەڭگە سوماسىندا نىسانالى ترانسفەرتتەر كوزدەلگەن. الدىن الا مالىمەتتەر بويىنشا ولارعا1 قاراشاعا 1,7 ترلن.تەڭگە ءبولىندى. ولاردىڭ 98,2%-ءى يگەرىلگەن. اتقارىلماعانى -31 ملرد. تەڭگە، ونىڭ ىشىندە 7 ملرد. تەڭگە ۇنەمدەلدى، 24 ملرد.تەڭگە يگەرىلمەدى. اقتوبە وبلىسىندا – 3,2 ملرد. تەڭگە، الماتى قالاسىندا – 3 ملرد. تەڭگە، سولتۇستىك قازاقستان – 2,5 ملرد. تەڭگە، باتىس قازاقستان – 2,3 ملرد. تەڭگە، تۇركىستان وبلىستارىندا – 1,9 ملرد. تەڭگە يگەرىلمەي قالعان»، - دەيدى ەرۇلان جاماۋباەۆ.
وسىلايشا، پرەمەر-مينيستر الدىندا ەسەپ جاساعان قارجى ءمينيسترى قايتا ايلانىپ كەلىپ، وسى مينيسترلەر (سونىڭ ىشىندە، وزىنە) مەن اكىمدەرگە ەسكەرتۋ جاسادى.
«قارجى جىلىنىڭ اياقتالۋىنا دەيىن از ۋاقىت قالدى. وسىعان بايلانىستى، ورتالىق مەملەكەتتىك ورگاندار مەن جەرگىلىكتى اتقارۋشى ورگاندار جوسپارلانعان قاراجاتتى عانا ەمەس، سونداي-اق ۇكىمەت رەزەرۆىنەن بولىنگەن اقشانى دا يگەرۋدى جەدەلدەتۋى قاجەتەكەنىن ەسكە سالامىن»، - دەدى قارجى ءمينيسترى ەرۇلان جاماۋباەۆ.
ەركە جومارت،
“ادىرنا” ۇلتتىق پورتالى
