جەتىسۋ وبلىسىندا «پەتروگليف ىزكەسۋشىلەرى» قوعامدىق قورىنىڭ كومانداسى كوپتەن بەرى ىزدەلىپ جۇرگەن ورتاعاسىرلىق قالانىڭ ورنىن تاپقان بولۋى مۇمكىن، دەپ حابارلايدى "ادىرنا" ۇلتتىق پورتالى.
بۇل تۋرالى اتالمىش قوردىڭ قىزمەتكەرى ولگا گۋميروۆا كەشە الەۋمەتتىك جەلىدەگى پاراقشاسىندا جازدى.
«2025 جىلدىڭ 6 ماۋسىمى. بۇگىنگى كۇن بوسقا وتكەن جوق. ءبىز كوپتەن بەرى ىزدەپ جۇرگەن ورتاعاسىرلىق قالانىڭ ورنىن تاپتىق! بۇل قالا جايلى جازبا دەرەكتەردە مالىمەتتەر بار. ارحەولوگتار دا بۇل تۋرالى حاباردار»، – دەپ جازدى ول جۇما كۇنى Facebook پاراقشاسىندا.
الدىمەن قور قىزمەتكەرلەرى كارەردەن كىرپىشتەن قالانعان قابىرعانىڭ قالدىقتارىن، كەرەمەت جاعدايدا ساقتالعان مۇنارانى بايقاسا، كەيىنىرەك ورتاعاسىرلىق كىرپىشتەرى بالقىپ كەتكەن ۇلكەن قابىرعانى تاپقان.
«بۇل قالا موڭعول شاپقىنشىلىعى كەزىندە قاتىگەزدىكپەن ورتەلگەن. جالپى، بۇل كونە قالا تالحيز نەمەسە قويلىقپەن تەڭ. بۇل نىساننىڭ ناقتى نە ەكەنى جايلى پىكىرتالاس ءجۇرىپ جاتىر. انىقتايتىن بولامىز»، – دەدى ولگا گۋميروۆا.


