پرەمەر-مينيستر ولجاس بەكتەنوۆ ءماجىلىس دەپۋتاتتارىنىڭ قازاقستاننىڭ ءتورتىنشى عارىشكەرىن ۇشىرۋعا قاتىستى ساۋالىنا جاۋاپ بەردى، دەپ حابارلايدى “ادىرنا” ۇلتتىق پورتالى.
ۇكىمەت باسشىسىنىڭ ايتۋىنشا، قازاقستاندىق عارىشكەرلەردىڭ قاتىسۋىمەن وتەتىن حالىقارالىق عارىش باعدارلامالارى تەك ۇلتتىق جانە حالىقارالىق دەڭگەيدە ورىندى دەپ تانىلعان جاعدايدا عانا جۇزەگە اسىرىلادى.
“باسقارىلاتىن باعدارلامالارعا قاتىسۋ قوماقتى قارجى شىعىندارىن تالاپ ەتەدى. وعان تەك ۇشۋدىڭ ءوزى عانا ەمەس، عارىشكەردى دايارلاۋ، عىلىمي باعدارلاما، لوگيستيكا جانە ۇشۋدان كەيىنگى قىزمەت كورسەتۋ كىرەدى”، – دەدى بەكتەنوۆ.
ول بۇل ماسەلە اسا سالماقتى ءارى پراگماتيكالىق شەشىمدى قاجەت ەتەتىنىن اتاپ ءوتتى. ەگەر جوبانىڭ وزەكتىلىگى مەن نەگىزدىلىگى راستالسا، وندا ۇشۋ ءتيىستى حالىقارالىق مىندەتتەمەلەردى ساقتاي وتىرىپ جانە ەلدىڭ قارجىلىق مۇمكىندىكتەرىنە قاراي جۇزەگە اسىرىلادى.
ايتا كەتەيىك، عارىشكەر ايدىن ايىمبەتوۆ بۇعان دەيىن كەلەسى قازاق عارىشكەرى قىز بولۋى مۇمكىن ەكەنىن ايتقان ەدى. ونىڭ پىكىرىنشە، قازاقستاننىڭ قىزدارى بۇل سالادا ەرلەرمەن تەڭ دارەجەدە جۇمىس ىستەي الادى.
ۇقساس جاڭالىقتار
