جەتىسۋ وبلىسىندا ساق داۋىرىنە تيەسىلى قورعاندار تونالدى

ەلىمىزدە ساق داۋىرىنە جاتاتىن ەجەلگى قورعاندار تونالدى، دەپ حابارلايدى “ادىرنا” ۇلتتىق پورتالى ”جەتىنشى ارناعا” سىلتەپ. ءدال وسىدان بىرنەشە مىڭ جىل بۇرىن سالىنعان قورعاندار جاركەنت قالاسىنان 100 شاقىرىم جەردە ورنالاسقان. ەجەلگى ەسكەرتكىشتىڭ تونالعانىن العاش بولىپ سارىبەل اۋىلىنىڭ تۇرعىنى ولەگ تيحوميروۆ بايقاعان. «مەن، ارينە، قاتتى اشۋلاندىم. مەن ءاردايىم مۇنداي ارەكەتتەرگە قارسىمىن. مۇنداي ىستەر جازاسىز قالماۋى كەرەك. ويتكەنى بىزدە ءالى دە وسىنداي قازىنالار بار. ەگەر وسى ءۇردىس جالعاسا بەرسە، بولاشاق ۇرپاعىمىز – بالالار مەن نەمەرەلەرىمىز – مۇنداي بايلىقتاردى كورمەي قالادى. سوندىقتان كەلگەن بەتتە اكىمدىك تە، وزگە دە ءتيىستى مەكەمەلەرگە حابار بەردىم»، – دەدى اۋىل تۇرعىنى. ازاماتتىڭ شاعىمى ەسكەرتكىشتەردى قورعاۋ ورتالىعىنا جولدانعان. مامانداردىڭ بولجامىنشا، بۇل جەردە سكيف كوسەمدەرى جەرلەنۋى مۇمكىن. الايدا ۇرىلار ارنايى تەحنيكانىڭ كومەگىمەن ۇلكەن قورىمدى قازىپ ۇلگەرگەن. «سكيفتەر داۋىرىندە التىن مەن باسقا دا قۇندى بۇيىمدار وتە كوپ بولعان. باسقا كەزەڭدەرمەن سالىستىرعاندا، ءدال وسى داۋىردە جەرلەۋ راسىمىندە باعالى زاتتار ءجيى قولدانىلعان. سوندىقتان “قارا ارحەولوگتار” ءبىز ءۇشىن ۇلكەن قاۋىپكە اينالدى. قازىر وسى ەسكەرتكىشتەردىڭ بۇزىلۋىنا بايلانىستى قۇزىرلى ورگاندارعا ارىز تۇسىرەمىز جانە جۇمىس جۇرگىزەمىز»، – دەدى ەسكەرتكىشتەردى قورعاۋ ورتالىعىنىڭ ديرەكتورى عالىمجان وسپانوۆ. جەتىسۋ وبلىسىندا كوپتەگەن كونە قورعاندار ورنالاسقان. مەملەكەتتىك قورعاۋعا الىنعانىنا جانە ارنايى بەلگىلەر قويىلعانىنا قاراماستان، ولاردىڭ كوپشىلىگى بۇزىلعان.