سوڭعى قوڭىراۋعا اقشا جيناۋعا جانە مۇعالىمدەرگە سىيلىق بەرۋگە تىيىم سالىندى

2024–2025 وقۋ جىلىنىڭ سوڭىندا وتەتىن «سوڭعى قوڭىراۋ»، قورىتىندى اتتەستاتتاۋ جانە باسقا دا مەكتەپىشىلىك ءىس-شارالارعا بايلانىستى بىرقاتار تالاپتار مەن ەرەجەلەر ەنگىزىلدى، دەپ حابارلايدى “ادىرنا”.

مەكتەپ باسشىلىعىنىڭ تالابىنشا، سىيلىق نەمەسە اقشالاي العىس بەرۋگە بولمايدى. تەك «ريزاشىلىق سوزدەرمەن» جانە «العىس حاتتارمەن» شەكتەلۋى ءتيىس. مۇعالىمدەرگە نەمەسە مەكتەپ اكىمشىلىگىنە سىيلىق بەرۋگە قاتاڭ تىيىم سالىنعان. ونىڭ ىشىندە، وقۋشىلارىنان مەكتەپ قاجەتتىلىكتەرىنە وراي اقشا جيناۋ دا بار. مەكتەپ ىشىندەگى جوندەۋ نەمەسە تازالىق جۇمىستارىنا قاراجات جيناۋ دا ورىنسىز. سونىمەن قاتار الەۋمەتتىك جاعىنان از قامتىلعان وتباسىدان شىققان بالالاردىڭ كوڭىل-كۇيىنە دە ءمان بەرىلمەك. سوڭعى قوڭىراۋعا اقشا جيناۋعا تىيىمنىڭ ءبىر ماقساتى وسىندا جاتىر. «سىيلاستىق پەن تارتىپكە ساي ەمەس ارەكەتتەر جول بەرىلمەيدى. جەكەلەگەن وقۋشىلاردى ءبولىپ-جارۋعا، ماتەريالدىق جاعدايعا بايلانىستى كەمسىتۋگە جول بەرىلمەيدى»، – دەلىنگەن نۇسقاۋلىقتا. تارتىپكە ساي ەمەس ارەكەتتەر دەپ داۋىس كوتەرۋ، رۇقساتسىز سويلەۋ، ءوز بەتىنشە شەشىم قابىلداۋ كورسەتىلىپتى. مەيرامحانالار، ويىن-ساۋىق ورتالىقتارى، ساياباقتار مەن اۆتوكولىك شەرۋلەرىن ۇيىمداستىرۋعا رۇقسات جوق. سىنىپ ىشىندە داستارقان جايۋعا نەمەسە اتا-انالاردان قوسىمشا اقشا تالاپ ەتۋگە بولمايدى. «سوڭعى قوڭىراۋ» شاراسىنا تەك وقۋشىنىڭ ءبىر زاڭدى وكىلى عانا قاتىسا الادى. ايتا كەتەيىك، بيىل وقۋ جىلىنىڭ سوڭعى قوڭىراۋى 23-ءشى نەمەسە 24 مامىر كۇنى سوعىلادى.