اقش پرەزيدەنتى دونالد ترامپ قىتايدان اكەلىنەتىن تاۋارلارعا سالىناتىن يمپورتتىق باج سالىعىن بۇرىن ايتىلعاننان دا كوبىرەك ارتتىردى. 10 ءساۋىر كۇنى اق ءۇي تۇسىندىرگەندەي، الدىڭعى كۇنى جاريالانعان 125 پايىزدىق باج سالىعىنا ناۋرىزدا ەنگىزىلگەن 20 پايىز دا قوسىلادى. وسىلايشا، قىتاي ءۇشىن جالپى تاريف كولەمى 145 پايىزدى قۇرايدى. بۇل تۋرالى باتىس اقپارات اگەنتتىكتەرى جاريالادى، دەپ حابارلايدى “ادىرنا” ۇلتتىق پورتالى.
ترامپ بۇل سالىقتى پەكيننىڭ فەنتانيل ەسىرتكىسىنىڭ زاڭسىز ساۋداسىنا بايلانىستى ارەكەتسىزدىگىمەن ءتۇسىندىردى. سونداي-اق، ول قىتايدى "الەمدىك نارىققا جەتكىلىكتى قۇرمەت كورسەتپەي وتىر" دەپ ايىپتادى.
بۇعان دەيىن قىتاي تاراپىنان اقش تاۋارلارىنا سالىناتىن باج سالىعى ەكى ەسەگە، ياعني 20 پايىزعا كوتەرىلگەننەن كەيىن، پەكين امەريكالىق ونىمدەرگە ءتاريفتى 34 پايىزدان 84 پايىزعا دەيىن ارتتىراتىنىن مالىمدەگەن بولاتىن.
سوڭعى اپتالاردا دونالد ترامپ اقش-قا ەۋرووداقتان جانە باسقا ەلدەردەن اكەلىنەتىن ءتۇرلى تاۋارلارعا بىرنەشە ساۋدا باجدارىن ەنگىزدى. 9 ءساۋىر كۇنى اقش پرەزيدەنتى كوپتەگەن ەلدەرگە كەدەندىك باج سالىعىن ەنگىزۋدى 90 كۇنگە كەيىنگە قالدىرعانىمەن، بۇل شەشىم قىتايعا قولدانىلمادى. كەرىسىنشە، قحر ءۇشىن 125 پايىزدىق تاريف جاريالاندى.
