الماتىدا ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىندا «بىرىككەن ۇلتتار ۇيىمىنىڭ ءبولىنۋدى باقىلاۋ جونىندەگى كۇشتەرى» ميسسياسى قۇرامىندا قىزمەت ەتۋ ءۇشىن گولان جوتالارىنا ەكىنشى ۇلتتىق بىتىمگەرلىك كونتينگەنتتى سالتاناتتى تۇردە شىعارىپ سالۋ ءراسىمى ءوتتى. بۇل تۋرالى قورعانىس مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
اقپاراتقا سايكەس، راسىمگە قورعانىس مينيسترلىگى بىتىمگەرلىك وپەراتسيالار ورتالىعىنىڭ قولباسشىلىعى، قىزمەتتەستەر، قارۋلى كۇشتەردىڭ ارداگەرلەرى، اسكەري جوعارى وقۋ ورنىنىڭ كۋرسانتتارى، «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى، سونداي-اق اسكەري قىزمەتشىلەردىڭ تۋىستارى مەن جاقىندارى قاتىستى.
قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور شايح-حاسان جازىقباەۆ بىتىمگەرلەرگە اقجول تىلەدى. ول قازاقستاننىڭ حالىقارالىق قاۋىپسىزدىكتى قولداۋ ىسىنە قاتىسۋىنىڭ ماڭىزدىلىعىن اتاپ ءوتتى.
«بىتىمگەرلىك كونتينگەنتتى گولان جوتالارىنا ءوز بەتىنشە ورىستەتۋ — قازاقستان رەسپۋبليكاسىنىڭ جانە ونىڭ قارۋلى كۇشتەرىنىڭ الەمدىك ارەناداعى بەدەلىنىڭ دالەلى. حالىقارالىق ستاندارتتار بويىنشا دايىندالعان جانە جاراقتاندىرىلعان ءبىزدىڭ كونتينگەنت بۇۇ ميسسياسىنىڭ مانداتى شەڭبەرىندە جۇكتەلگەن مىندەتتەردى ورىنداۋعا دايىن”، — دەپ اتاپ ءوتتى ول.
بۇدان سوڭ ەكىنشى بىتىمگەرلىك كونتينگەنتىنىڭ كومانديرى پودپولكوۆنيك جانىبەك نۇرلانوۆ باستاعان اسكەريلەر پلاتستا سالتاناتتى ساپپەن ءجۇرىپ ءوتتى. وسى ساتتەن قارۋلى كۇشتەردىڭ 139 اسكەري قىزمەتشىسى العاشقى كونتينگەنتتى اۋىستىرۋ ءۇشىن داماسكىگە جول تارتىپ كەتتى.
“بىتىمگەرلىك كونتينگەنتتىڭ بارلىق اسكەري قىزمەتشىلەرى ەرىكتى نەگىزدە قابىلداندى. ولاردىڭ اراسىندا ەكى ايەل بار. ىرىكتەۋ جان-جاقتى دايىندىق ناتيجەلەرى بويىنشا جۇرگىزىلدى. كانديداتتاردىڭ كاسىبي جانە مورالدىق قاسيەتتەرى ەسكەرىلدى. ءبىزدىڭ كونتينگەنت بۇۇ مانداتى شەڭبەرىندە قويىلعان بارلىق مىندەتتى ورىنداۋعا دايىن ەكەنىنە سەنىمدىمىز”، — دەپ اتاپ ءوتتى قورعانىس مينيسترلىگى بىتىمگەرلىك وپەراتسيالار ورتالىعىنىڭ باستىعى پودپولكوۆنيك ءۋاليحان بايكەنوۆ.
ايتا كەتسەك، قازاقستاندىق بىتىمگەرلەر اتىستى توقتاتۋ رەجيمىن قامتاماسىز ەتۋ، پاترۋلدەۋ، بلوكپوستاردى كۇزەتۋ، جارىلىس قاۋپى بار زاتتاردى جويۋ، سونداي-اق بۇۇ پەرسونالدارىن الىپ ءجۇرۋ مەن ەۆاكۋاتسيالاۋ جونىندەگى مىندەتتەردى ورىندايتىن بولادى. گولان جوتالارىندا قىزمەت ەتكەن كەزدە كونتينگەنتتىڭ العاشقى قۇرامى قويىلعان بارلىق مىندەتتى ويداعىداي ورىنداپ، بۇۇ ميسسياسى مەن حاتشىلىعىنىڭ باسشىلىعىنان جوعارى باعا العانىن ايتا كەتۋ كەرەك.
