كەشە دۋشانبە حالىقارالىق اۋەجايى يراننىڭ Varesh Airlines اۋە كومپانياسىنىڭ جولاۋشىلار ۇشاعى قونۋ كەزىندە ۇشۋ-قونۋ جولاعىنان شىعىپ كەتكەن سوڭ جۇمىسىن التى ساعاتتان استام ۋاقىتقا توقتاتتى، دەپ حابارلايدى “ادىرنا” ۇلتتىق پورتالى ASIA-Plus پورتالىنا سىلتەپ.
قازىرگى ۋاقىتتا اۋە ايلاعى قالىپتى رەجيمدە جۇمىس ىستەپ جاتىر، دەپ حابارلادى تاجىكستاننىڭ ازاماتتىق اۆياتسيا اگەنتتىگىنە سىلتەمە جاساعان «ازيا-پليۋس» اقپارات كوزى.
وقيعا كەشە، 10 ءساۋىر كۇنى، دۋشانبەلىك ۋاقىت بويىنشا 11:40-تا بولدى.
ازاماتتىق اۆياتسيا اگەنتتىگىنىڭ مالىمەتىنشە، تەگەران – دۋشانبە باعىتى بويىنشا ۇشىپ كەلگەن Boeing 737-500 ۇشاعى اۋا رايىنىڭ كۇرت ناشارلاۋىنا — كۇشتى بۇرشاققا بايلانىستى — قاۋىپسىز قونا الماي، ۇشۋ-قونۋ جولاعىنان شىعىپ كەتكەن. ۇشاق جولدان شىعىپ كەتكەندىكتەن، باسقا اۋە كەمەلەرىنىڭ قونۋى مەن ۇشۋىنا كەدەرگى كەلتىرىپ، ناتيجەسىندە اۋەجاي ۋاقىتشا جابىلدى. بارلىق رەيستەر ەلدىڭ سولتۇستىگىندەگى حۋدجاند اۋەجايىنا باعىتتالدى. تەك جەرگىلىكتى ۋاقىتپەن 19:00-دە ۇشاقتى تۇراققا سۇيرەپ اپارعاننان كەيىن دۋشانبە اۋەجايى تولىق جۇمىسىن قايتا باستادى.
الدىن الا مالىمەت بويىنشا، وقيعا سالدارىنان ەشكىم زارداپ شەككەن جوق.
