Magnum ساۋدا جەلىسىندە بولعان داۋ اياقتالدى. كۋرەر مەن تۇتىنۋشى حالىققا ارنايى ۆيدەو ۇندەۋ جولداپ، تۇسىنىسپەۋشىلىكتىڭ شەشىلگەنىن مالىمدەدى، دەپ حابارلايدى "ادىرنا" ۇلتتىق پورتالى.
ۆيدەودا تاپسىرىس جەتكىزۋشى (رەد. كۋرەر) جۇمىسقا قايتا ورنالاسقانىن ايتىپ، تۇتىنۋشىمەن تاتۋلاسقانىن كورسەتتى. ەكەۋى دە بولعان جاعدايعا قاتىستى حالىقتان ماسەلەگە نۇكتە قويۋدى سۇراپ، بارشا قولداۋ بىلدىرگەندەرگە العىس ايتتى.
"سوڭعى كۇندەرى الەۋمەتتىك جەلىدە ماعان جانە ماگنۋمعا قاتىستى اڭگىمە بولىپ جاتىر. سول تۋرالى ءتۇسىندىرىپ كەتسەم دەيمىن. الدىمەن بارشاڭىزعا قولداۋ كورسەتىپ جاتقانىڭىزعا ۇلكەن راقمەت ايتامىن. ءومىر بولعان سوڭ تۇسىنىسپەۋشىلىك بولىپ تۇرادى. بىراق ءبارىمىز قازاقپىز. ەلىمىزگە تاتۋلىق كەرەك. ءبىز كەزدەسىپ، قول الىسىپ، تاتۋلاستىق. قازىر ماگنۋمعا جۇمىسىمدى جالعاستىرىپ جاتىرمىن. جۇمىس بەرۋشىگە ەش شاعىمىم جوق. ءبارىمىز ءبىر قازاقپىز. ۇلكەن راقمەت!" - دەدى تاپسىرىس جەتكىزۋشى.
جەلىدە جازبا جاريالاپ، رەزونانس تۋدىرعان اسىلحان ەسىمدى ازامات تا پىكىر ءبىلدىردى.
"قادىرلى اعايىن! مۇنداي جاعدايدىڭ بولعانى وكىنىشتى. ءبىر-ءبىرىمىزدى تۇسىندىك. ال ەكەۋمىز ءبىر-بىرىمىزگە ەشقانداي وكپە-رەنىشىمىز جوق", - دەدى ول.
ايتا كەتەيىك، الەۋمەتتىك جەلىدە تاراپ كەتكەن وقيعا قوعامدا ۇلكەن رەزونانس تۋدىرعان بولاتىن. ەندى تاراپتار تاتۋلاسقاندارىن اشىق ءبىلدىرىپ، ءوزارا وكپە-رەنىشتىڭ قالماعانىن جەتكىزدى.
