بۇگىن قىرعىزستان پرەزيدەنتى سادىر جاپاروۆ 41 سوتتالعان ادامعا راقىمشىلىق جاساۋ تۋرالى جارلىققا قول قويدى، دەپ حابارلايدى "ادىرنا" ۇلتتىق پورتالى 24.kg-عا سىلتەمە جاساپ.
بۇل تۋرالى قىرعىزستاننىڭ جازالاردى اتقارۋ مەملەكەتتىك قىزمەتى مالىمدەدى.
راقىمشىلىققا ىلىككەندەر اراسىندا ازاماتتىق بەلسەندىلەر دە بار. ولاردىڭ قاتارىندا – اقىن ءارى جۋرناليست ازامات يشەنبەكوۆ تە بار. ول 2024 جىلى Temirov Live جانە «ايت ايت دەسە» جوبالارىنا بايلانىستى ۇستالعان. جاپپاي تارتىپسىزدىككە شاقىردى دەپ ايىپتالىپ، بەس جىلعا باس بوستاندىعىنان ايىرىلعان ەدى.
سونىمەن قاتار، بلوگەر زارينا توروكۋلوۆا دا راقىمشىلىققا ىلىكتى. ول 2023 جىلى جازۋشى ولجوباي شاكيردىڭ ۆيدەوسىن الەۋمەتتىك جەلىدە بولىسكەنى ءۇشىن ۇستالىپ، بەس جىلعا سوتتالعان بولاتىن.
Kaktus.media باسىلىمىنا بەرگەن سۇحباتىندا توروكۋلوۆانىڭ قىزى ايمان اناسىنىڭ جوعارعى سوت بىشكەك قالالىق سوتىنىڭ ۇكىمىن كۇشىندە قالدىرعاننان كەيىن راقىمشىلىق سۇراعانىن ايتتى. يشەنبەكوۆ تە راقىمشىلىق تۋرالى ءوتىنىش بەرگەن. بۇل جونىندە ونىڭ ادۆوكاتى ساپار اكۋن حابارلاعان.
توروكۋلوۆا مەن يشەنبەكوۆتىڭ 9 ءساۋىر كۇنى بوستاندىققا شىعادى دەپ كۇتىلۋدە.
راقىمشىلىققا ىلىككەن وزگە ادامداردىڭ اتى-ءجونى جاريالانعان جوق.
