“استانا كونتسەرت” كومپانياسىنىڭ پروديۋسەرى مالىك حاسەنوۆ الەمگە ايگىلى امەريكالىق ءانشى ءارى اكتريسا دجەننيفەر لوپەستىڭ استانادا وتەتىن كونتسەرتى ەلىمىز ءۇشىن عانا ەمەس، بۇكىل ورتالىق ازيا ءۇشىن ماڭىزدى وقيعا بولاتىنىن اتاپ ءوتتى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
“1 تامىزدا “استانا ارەنا” ستاديونىندا دجەننيفەر لوپەستىڭ كونتسەرتى وتەدى. بۇل — كوممەرتسيالىق نەگىزدە ۇيىمداستىرىلىپ وتىرعان ەرەكشە جوبا. قازاقستاننىڭ شوۋ-بيزنەس تاريحىندا مۇنداي دەڭگەيدەگى جوبا العاش رەت ءوتىپ جاتىر”، – دەدى حاسەنوۆ ۇكىمەت وتىرىسىندا.
پروديۋسەردىڭ ايتۋىنشا، كونتسەرت استانانىڭ الەمدىك ا-كلاسستى جۇلدىزداردىڭ گاسترولدىك كارتاسىنا ەنۋىنە جول اشادى.
“بۇل شاراعا 15 مىڭنان استام شەتەلدىك تۋريست كەلەدى دەپ كۇتىلۋدە. قالا ەكونوميكاسىنا، قوناق ءۇي، مەيرامحانا جانە كەيتەرينگ سالالارىنا (HoReCa) 6,5 ميلليارد تەڭگە پايدا تۇسەدى دەپ بولجانىپ وتىر. سونىمەن قاتار، 400 ميلليون تەڭگەدەن استام تىكەلەي سالىق ءتۇسىمى كۇتىلەدى”، – دەدى ول.
ەسكە سالا كەتەيىك، بۇعان دەيىن دجەننيفەر لوپەستىڭ Up All Night اتتى الەمدىك تۋرنەسى 1 شىلدەدە باستالىپ، 3 تامىزعا دەيىن جالعاساتىنى حابارلانعان. تۋر بارىسىندا ول الەمنىڭ 17 قالاسىنا ات باسىن بۇرادى، ولاردىڭ قاتارىندا استانا دا بار.
