استانادا اۋداندىق اكىمدىكتىڭ الدىندا تۇرعان سكۆەردەن نۇرسۇلتان نازارباەۆتىڭ سۋرەتى الىنىپ تاستالدى. سارىارقا اۋدانىنىڭ ءباسپاسوز قىزمەتى اقپاراتتى راستادى، دەپ حابارلايدى “ادىرنا” ۇلتتىق پورتالى.
بۇرىن سارىارقا اۋداندىق اكىمدىگىنىڭ الدىندا ەكس-پرەزيدەنتتىڭ مۇراعات رەتىندەگى سۋرەتتەرى مەن باسقا دا ساياساتكەرلەردىڭ سۋرەتى بار ستەندتەر تۇراتىن.
ءباسپاسوز قىزمەتىنىڭ مالىمەتىنشە، كەرەي، جانىبەك حاندار الاڭىندا قايتا جوندەۋ جۇمىستارى باستالدى. بۇل ەلوردا تۇرعىندارى مەن قوناقتارىنىڭ جايلىلىعىن جاقسارتۋ ماقساتىندا اتقارىلىپ جاتقان جۇمىس.
«جاڭارتۋ اياسىندا پلاكاتتارى بار قۇرىلعىلاردى بولشەكتەۋ جۇرگىزىلىپ جاتىر. ونىڭ ورنىنا كوپجىلدىق جاسىل الاڭدارى بار گۇلزارلار بولادى، بۇل ەكولوگيا مەن جالپى ەستەتيكانى جاقسارتۋعا ىقپال ەتەدى. سونداي-اق، جوبادا قوسىمشا جارىقتاندىرۋ، سىرتقى جيھازدى جاڭارتۋ جانە ۇيلەسىمدى لاندشافت ديزاينىن جاساۋ قاراستىرىلعان»، دەپ جاۋاپ بەردى سارىارقا اۋدانىنىڭ ءباسپاسوز قىزمەتى.
