بەلارۋس پرەزيدەنتى الەكساندر لۋكاشەنكو امەريكالىق بلوگەر ماريو ناۋفالعا بەرگەن سۇحباتىندا ۋكراينا پرەزيدەنتى ۆلاديمير زەلەنسكيگە ءوز ۇلىمداي قاراعانىن مالىمدەدى، دەپ حابارلايدى "ادىرنا" ۇلتتىق پورتالى بەلتاعا سىلتەپ.
سۇحبات بارىسىندا ماريو ناۋفال زەلەنسكيدىڭ قيىن جاعدايدا قالعانىن اتاپ ءوتتى. ونىڭ ايتۋىنشا، قازىرگى وقيعالار اياسىندا زەلەنسكي ەرجۇرەك ادام رەتىندە كورىنگەنىمەن، ول وزگەلەردىڭ ويىنىنداعى پەشكاعا اينالىپ، سوعىسقا اكەلگەن قاتەلىكتەر جىبەردى.
"مەن دە زەلەنسكيگە جانىم اشيدى. وعان ءوز ۇلىمداي قارادىم. ءبىز جاقسى قارىم-قاتىناستا بولدىق، ۋكراينادا كەزدەسىپ، كەلىسسوزدەر جۇرگىزدىك. ول ماعان اقىلدى ادام بولىپ كورىندى، بىراق العاشقى قادامدارىندا كوپ نارسەنى بىلمەدى. مەنەن كەڭەس سۇراپ ءجۇردى. بىزدە جىلى، دوستىق قارىم-قاتىناس بولدى. بىراق ول ۋلتراۇلتشىل كۇشتەردىڭ جەتەگىندە كەتتى، بۇل – ۇلكەن قاتەلىك", – دەدى لۋكاشەنكو.
بەلارۋس باسشىسى زەلەنسكيدىڭ ۋكراينالىقتارعا بەرگەن ەڭ ۇلكەن ۋادەسى – سوعىستى توقتاتۋ ەكەنىن ەسكە سالدى.
"بىراق ول كەرىسىنشە، سوعىستى ودان ءارى ۋشىقتىردى. بۇل جانجالدىڭ ورشۋىنە ءوزى سەبەپكەر بولدى. ساياساتتا جاناشىرلىق بولمايدى. سەن ءوز ەلىڭ ءۇشىن، حالقىڭ ءۇشىن جاۋاپتىسىڭ. ال ونىڭ ساياساتى ەلدىڭ كۇيرەۋىنە جانە حالىقتىڭ كەدەيلەنۋىنە اكەلدى", – دەپ تۇيىندەدى لۋكاشەنكو.
