14 اقپان كوبىنە اۋليە ۆالەنتين كۇنى نەمەسە عاشىقتار كۇنى رەتىندە تانىمال. الايدا، سوڭعى جىلدارى بۇل كۇندى كىتاپ سىيلاۋ مەرەكەسى رەتىندە تويلاپ ءجۇرمىز. بۇل مەرەكەنىڭ باستاۋى قاي كەزدەن بەرى بار؟
2012 جىلدان باستاپ جىل سايىن 14 اقپاندا حالىقارالىق كىتاپ سىيلاۋ كۇنى (International Book Giving Day) اتالىپ وتەدى. بۇل مەرەكە كىتاپتاردى بالالارعا سىيلاپ، ولاردىڭ وقۋعا دەگەن سۇيىسپەنشىلىگىن ارتتىرۋعا باعىتتالعان.
كەيبىر مەرەكەلەر بۇۇ نەمەسە باسقا حالىقارالىق ۇيىمداردىڭ باستاماسىمەن پايدا بولسا، كەيبىرى مەملەكەتتىك، ءدىني نەمەسە كاسىبي مەيرامدار بولىپ تابىلادى. ال «حالىقارالىق كىتاپ سىيلاۋ كۇنى» – حالىق اراسىنان شىققان ەرەكشە مەرەكە. ونى العاش رەت امەريكالىق ەممي برودمۋر – بالالارعا ارنالعان كىتاپ سايتىنىڭ نەگىزىن قالاۋشى – باستاما رەتىندە كوتەرگەن.
ەممي برودمۋر ءۇش بالانىڭ اناسى بولعان. ءبىر كۇنى ۇلى ودان: «نەگە ادامدار ءبىر-بىرىنە كىتاپ سىيلايتىن ارنايى كۇن جوق؟» – دەپ سۇراعان. وسى ساۋال ونى ويلاندىرىپ، 2012 جىلى ەممي ءوزىنىڭ بلوگەر دوستارى، الەۋمەتتىك جەلىدەگى تانىستارى جانە ارىپتەستەرى ارقىلى حالىقارالىق كىتاپ سىيلاۋ كۇنىن ۇيىمداستىرۋدى قولعا الادى.
بالانىڭ قاراپايىم سۇراعى مەن اناسىنىڭ باستاماسى بۇكىل الەمگە تاراپ، ميلليونداعان ادامنىڭ قولداۋىنا يە بولدى. وسىلايشا، 14 اقپان تەك عاشىقتار عانا ەمەس، كىتاپ سۇيەر قاۋىم ءۇشىن دە ەرەكشە كۇنگە اينالدى.
14 اقپاندا ادامدار كىتاپتاردى نەگىزىنەن بالالارعا، سونداي-اق كىتاپ وقۋعا مۇمكىندىگى شەكتەۋلى جاندارعا سىيعا تارتادى. بىراق كىتاپ وقۋدى جاقسى كورەتىندەر تەك بالالار ەمەس. بۇگىندە كوپتەگەن ەرەسەكتەر كىتاپتىڭ رۋحاني قۇندىلىعىن، ونىڭ ادامعا بەرەتىن اسەرىن، اۆتور جەتكىزگەن ەموتسيالار مەن ويلاردىڭ ماڭىزدىلىعىن تۇسىنەدى.
بالالار ءۇشىن كىتاپ – تەك ءبىلىم كوزى عانا ەمەس، سونىمەن قاتار ولاردى مەيىرىمدىلىككە، دوستىققا، ءبىر-بىرىنە كومەكتەسۋگە، جاقىندارىنا دەگەن سۇيىسپەنشىلىككە جانە جاناشىرلىققا ۇيرەتەتىن قۇرال. ال وسى قاسيەتتەر ولاردى شىنايى ادام بولۋعا جەتەلەيدى.
بۇل مەرەكەنى ۇيىمداستىرۋشىلار كىتاپتىڭ ماڭىزدىلىعىن ەستەن شىعارماۋعا شاقىرادى. وكىنىشكە قاراي، الەمدە ءالى كۇنگە دەيىن كىتاپ وقۋعا مۇمكىندىگى جوق ادامدار بار. كەيبىرەۋلەرى قارجىلىق قيىندىقتارعا بايلانىستى، ال كەيبىرەۋلەرى الەۋمەتتىك جاعدايىنا بايلانىستى كىتاپقا قول جەتكىزە المايدى.
جەتىمحانالار، بالالار ۇيلەرى، ارنايى ينتەرناتتار مەن اۋرۋحانالاردا ءومىر ءسۇرىپ جاتقان بالالار ءۇشىن كىتاپ ۇلكەن قۋانىش سىيلاي الادى. ۇيىڭىزدە ءسىز وقىپ بىتىرگەن نەمەسە بالالارىڭىزعا قاجەتسىز بولىپ قالعان كىتاپتار بولسا، ولاردى وسىنداي مەكەمەلەرگە سىيعا تارتۋ – يگى ءىس.
قازىرگى زاماندا گادجەتتەر ادامنىڭ باستى سەرىگىنە اينالعانىمەن، كىتاپ وقۋدىڭ ورنى بولەك. كىتاپ – تەك اقپارات كوزى عانا ەمەس، ادامنىڭ ويلاۋ قابىلەتىن دامىتاتىن، رۋحاني بايىتاتىن، جاڭا الەمدەرگە جول اشاتىن ەرەكشە قۇرال.
سوندىقتان 14 اقپاندا جاقىندارىڭىزعا نەمەسە كىتاپقا مۇقتاج جاندارعا ءبىر كىتاپ سىيلاپ كورىڭىز. مۇمكىن، ءدال ءسىزدىڭ سىيلىعىڭىز بىرەۋدىڭ ءومىرىن وزگەرتەتىن شىعار!
انەل الىمبەكقىزى
