سەربيادا ستۋدەنتتەر نارازىلىعى كۇشەيۋدە. جاستار نوۆي-ساد قالاسىنا ەكى كۇندىك شەرۋگە شىقتى. بۇل تۋرالى Euronews جازدى، دەپ حابارلايدى “ادىرنا” ۇلتتىق پورتالى.
نازالىققا شىققان جاستار ءبىر جىل بۇرىن بيلىك سالعىرتتىعىنان ادامدار قازا تاپقانىن العا تارتتى.
بەيسەنبىدە جۇزدەگەن ستۋدەنت بەلگرادتان بىلتىر ۆوكزالدىڭ شاتىرى قۇلاپ، 15 ادام قازا تاپقان نوۆي-ساد قالاسىنا 80 شاقىرىم جول ءجۇرىپ وتكەن. قايعىلى وقيعا سوڭعى جىلدارداعى ەڭ ۇلكەن ساياسي داعدارىستى تۋدىردى، بەلگراد پەن باسقا قالالارداعى نارازىلىق شەرۋلەرى جالعاسىپ كەلەدى.
“بۇل مارش ءبىزدىڭ قانشالىقتى راديكالدى ەكەنىمىزدى، توقتامايتىنىمىزدى جانە سوڭىنا دەيىن بارعىمىز كەلەتىنىن كورسەتۋدىڭ تاعى ءبىر جولى”، — دەدى بەلگراد تەحنيكالىق ۋنيۆەرسيتەتىنىڭ ستۋدەنتى ۆاسيلي ميلانوۆيچ.
ستۋدەنتتەر تەرگەۋدىڭ اشىق جۇرگىزىلۋىن، كىنالىلەردىڭ جازالانۋىن تالاپ ەتىپ، ۆوكزالداعى جوندەۋ جۇمىستارىنىڭ ساپاسىز جۇرگىزىلۋىنە سىبايلاس جەمقورلىق پەن نەپوتيزم سەبەپ بولعانىنا سەنىمدى.
وتكەن اپتادا نارازىلىق شەرۋلەرى ەرەۋىلگە ۇلاستى، سودان كەيىن ستۋدەنتتەر بەلگرادتىڭ نەگىزگى جولىن ءبىر كۇنگە جاۋىپ تاستادى.
