قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى قاسقىر مەن شيبورىلەردى اتۋ تۋرالى ماڭىزدى اقپاراتپەن ءبولىستى، دەپ حابارلايدى "ادىرنا" ۇلتتىق پورتالى.
2025 جىلعا ارنالعان قاسقىر مەن شيبورىلەردىڭ سانىن رەتتەۋدىڭ بيولوگيالىق نەگىزدەمەسى دايىندالعان.
«2025 جىلدىڭ 15 قاڭتار ساعات 10:00-دەن باستاپ رەتتەۋ قاجەت تۇرلەردىڭ (قاسقىر، ءشيبورى) اۋلاۋعا رۇقسات الۋ مۇمكىندىگى اشىلادى. بيولوگيالىق نەگىزدەمەگە سايكەس، جانۋارلار سانىن رەتتەۋ مەرزىمى 2025 جىلدىڭ 31 جەلتوقسانىنا دەيىن بەكىتىلدى»، – دەپ مالىمدەدى ورمان شارۋاشىلىعى جانە جانۋارلار دۇنيەسى كوميتەتى.
اقمولا، باتىس قازاقستان، قاراعاندى، قوستاناي، ماڭعىستاۋ، پاۆلودار جانە ۇلىتاۋ وبلىستارىندا رۇقسات تەك ءۇي جانۋارلارىنا شابۋىل تىركەلگەن جاعدايدا عانا بەرىلەدى.
جانۋارلار سانىن رەتتەۋ بويىنشا رۇقسات الۋ ءراسىمى قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ءمينيسترىنىڭ 2020 جىلعى 30 جەلتوقسانداعى №347 «جانۋارلار تۇرلەرىن الۋ بويىنشا رۇقسات بەرۋ ەرەجەلەرىن بەكىتۋ تۋرالى» بۇيرىعىمەن رەتتەلەدى.
كوميتەتتىڭ ايتۋىنشا بۇل قىزمەت تولىعىمەن اۆتوماتتاندىرىلعان. «ەلەكتروندىق ۇكىمەت» ۆەب-پورتالىندا www.elicense.kz ارقىلى قىزمەتتى پايدالانۋعا بولادى.
