سەمەيدە وقۋشىعا قول كوتەرگەن وفيتسەر-تاربيەشى قىزمەتتىك تەرگەۋ ناتيجەسىندە سوگىس العان، دەپ حابارلايدى "ادىرنا" ۇلتتىق پورتالى.
ەر ادام 2022 جىلدىڭ قاراشا ايىندا 8-سىنىپ وقۋشىسىن باسىنان ۇرعان.
الەۋمەتتىك جەلىلەردى باقىلاۋ كەزىندە 2022 جىلدىڭ قاراشا ايىندا تۇسىرىلگەن ۆيدەو انىقتالعان.
“ۆيدەودا وفيتسەر-تاربيەشى ا.ك.س ستۋدەنت ر.د.ت-عا قارسى كۇش قولدانعانى انىق كورسەتىلگەن. تاربيەشى پەداگوگيكالىق ادەپ كەڭەسىنە شاقىرىلىپ، وعان سوگىس تۇرىندەگى تارتىپتىك جازا تاعايىندالدى”، – دەپ حابارلادى اباي اۋداندىق ءبىلىم باسقارماسىنىڭ ءباسپاسوز قىزمەتى.
جەلىدەگى جازبادا انىقتالعانداي، وفيتسەر-تاربيەشى وقۋشىعا ءوز بەتىنشە دايىندىق كەزىندە ۇلگەرىمى ءۇشىن سوگىس جاريالاپ، ارتىنشا ونىڭ جەلكە تۇسىنان الاقانىمەن ەكى رەت ۇرعان.
ءبىلىم باسقارماسى پەداگوگتىڭ وقۋشىنىڭ دەنساۋلىعىنا ەشقانداي زيان كەلتىرمەگەنىن جانە مەديتسينالىق كومەككە جۇگىنبەگەنىن، ال وقۋشىنىڭ اتا-اناسى مۇعالىمگە ەشقانداي ارىز جازباعانىن اتاپ ءوتتى.
"سونىمەن قاتار مۇنداي ارەكەتتەردىڭ الدىن الۋعا باعىتتالعان ءبىلىم بەرۋ قىزمەتكەرلەرىمەن جالپى جينالىس وتكىزىلدى. ليتسەي ديرەكتورىنىڭ تاربيە ءىسى جونىندەگى ورىنباسارى مەن الەۋمەتتىك پەداگوگكە قىزمەتكەرلەرمەن پروفيلاكتيكالىق جۇمىستى كۇشەيتۋ تاپسىرىلدى", – دەپ اتاپ ءوتتى ءبىلىم باسقارماسىندا.
