كاليفورنيا شتاتىنىڭ لوس-اندجەلەس قالاسىندا ورىن العان ورمان ورتتەرى سالدارىنان قازا تاپقاندار سانى بەس ادامعا جەتتى، دەپ حابارلايدى “ادىرنا” ۇلتتىق پورتالى.
لوس-اندجەلەس وكرۋگىنىڭ شەريفى روبەرت لۋنانىڭ مالىمدەۋىنشە، ءورت ءالى تولىق سوندىرىلمەگەندىكتەن، قۇرباندار سانى ارتۋى مۇمكىن. قۇرعاق اۋا رايى مەن قاتتى جەل جاعدايدى ودان ءارى قيىنداتۋدا.
قازىرگى ۋاقىتتا لوس-اندجەلەس ايماعىندا بەس ورمان ءورتى بەلسەندى تۇردە جالعاسۋدا. ەۆاكۋاتسيا ايماقتارىندا 150 مىڭعا جۋىق ادام تۇرادى. ەڭ ءىرى ءورت سانتا-مونيكا مەن ماليبۋ اراسىنداعى پاسيفيك-پاليسەيدس ايماعىندا تىركەلىپ، ونىڭ اۋماعى 60 شارشى شاقىرىمنان استى. لوس-اندجەلەس وكرۋگى ءورت ءسوندىرۋ ءبولىمىنىڭ باستىعى ەنتوني ماررونەنىڭ ايتۋىنشا، ءورت كەم دەگەندە 1000 قۇرىلىمدى جويعان.
ماليبۋ اۋدانىندا كوپتەگەن تانىمال تۇلعالاردىڭ ۇيلەرى ورنالاسقان. اكتريسا جانە ءانشى پەريس حيلتوننىڭ جاعاجايداعى ۇيلەرىنىڭ ءبىرى تولىعىمەن ورتەنىپ كەتكەنى حابارلاندى. بۇل اقپاراتتى حيلتوننىڭ ءوزى راستادى. سونىمەن قاتار، لوس-اندجەلەستىڭ باسقا دا تانىمال تۇرعىندارىنىڭ ۇيلەرى ورتتەن زارداپ شەككەنى تۋرالى مالىمەتتەر بار.
بەيسەنبىگە قاراعان ءتۇنى بيلىك لوس-اندجەلەستىڭ ەڭ تانىمال اۋداندارىنىڭ ءبىرى – گولليۆۋد بەلگىسى ورنالاسقان گولليۆۋد توبەشىگى ايماعىندا تاعى ءبىر ءورت شىققانىن حابارلادى.
اقش-تىڭ فەدەرالدى اۆياتسيا باسقارماسى ءورت ايماعىنا ۇشۋعا تىيىم سالدى، اتاپ ايتقاندا، اتاقتى پاليسەيدس اۋدانى مەن ماليبۋ جاعاجايىندا ورنالاسقان گولليۆۋد بەلەسىنە بارۋعا رۇقسات جوق.
ءورت ءسوندىرۋ قىزمەتتەرى جالىندى اۋىزدىقتاۋ ءۇشىن بار كۇشىن سالۋدا، الايدا اۋا رايىنىڭ قولايسىزدىعى مەن جەلدىڭ كۇشەيۋى جۇمىستى قيىنداتۋدا. تۇرعىندارعا قاۋىپسىزدىك شارالارىن ساقتاۋ جانە ەۆاكۋاتسيالاۋ نۇسقاۋلارىن ورىنداۋ ۇسىنىلادى.
