رەسەي پرەزيدەنتى ۆلاديمير پۋتيننەن قازاقستاندىقتاردىڭ ۇشاق اپاتىندا قازا بولۋىنا بايلانىستى كەشىرىم سۇراپ، وتەماقى تولەۋ تالاپ ەتىلدى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
«قۇرمەتتى ۆلاديمير پۋتين مىرزا! ازەربايجان پرەزيدەنتى يلحام اليەۆتىڭ مالىمدەمەسىن قولداي وتىرىپ، رەسەيلىك تاراپ بارلىق زارداپ شەككەندەرگە، ونىڭ ىشىندە قازاقستان ازاماتتارىنا دا وتەماقى تولەۋى ءتيىس دەپ سانايمىز»، – دەپ قازاقستان قوعامىنىڭ اتىنان ازاماتتىق بەلسەندى مۇرات تەلىبەكوۆ پۋتينگە ۇندەۋ جاسادى.
ۇندەۋدە رەسەي مۇنى تەرگەۋ ناتيجەسىن كۇتپەي-اق جۇزەگە اسىرۋى، سونداي-اق ازەربايجان، قازاقستان، قىرعىزستان تۇرعىندارى مەن ءوز ازاماتتارىنان كەشىرىم سۇراۋى قاجەت دەپ ايتىلعان.
«قالىپتاسقان قاۋىپتەرگە قاراماستان، بۇل ەلدىڭ بەدەلىنە زيان كەلتىرمەيدى. كەرىسىنشە، ءوز كىناسىن ەرلىكپەن مويىنداۋ – ونى وتەيتىن قادام بولماق. ال ۇشاقتىڭ قوزعالتقىشىنا قۇستاردىڭ ءتۇسۋى نەمەسە سالونىنداعى وتتەگى باللونىنىڭ جارىلۋى تۋرالى قيسىنسىز بولجامدار تاراتۋ رەسەيلىك بيلىكتىڭ ابىرويىنا نۇقسان كەلتىرەدى»، – دەلىنگەن ۇندەۋدە.
ەسكە سالا كەتسەك، 25 جەلتوقسان كۇنى اقتاۋ اۋەجايى ماڭىندا Azerbaijan Airlines اۋە كومپانياسىنىڭ باكۋ – گروزنىي باعىتىنداعى جولاۋشىلار ۇشاعى اپاتقا ۇشىراپ، 38 ادام قازا تاپتى. بورتتا 5 ەكيپاج مۇشەسىن قوسا العاندا 67 ادام بولعان. جولاۋشىلاردىڭ 6-اۋى قازاقستان، 42-ءسى ازەربايجان، 3-ەۋى قىرعىزستان، 16-سى رەسەي ازاماتى. 29 ادام جاراقات الىپ، اۋرۋحاناعا جاتقىزىلدى، ولاردىڭ اراسىندا ەكى بالا بار. اپاتتان امان قالعاندار اراسىندا قازاقستاندىقتار جوق.
