30 جەلتوقسان كۇنى استاناعا قىتاي حالىق رەسپۋبليكاسىنىڭ قازاقستان رەسپۋبليكاسىنداعى جاڭا توتەنشە جانە وكىلەتتى ەلشىسى حان چۋنلين كەلدى. بۇل تۋرالى قىتايدىڭ قازاقستانداعى ەلشىلىگى مالىمدەدى، دەپ حابارلايدى “ادىرنا” ۇلتتىق پورتالى.
اقپارات بويىنشا، حان ءچۋنليندى اۋەجايدا قازاقستاننىڭ سىرتقى ىستەر مينيسترلىگىنىڭ قىزمەتكەرلەرى مەن قىتايدىڭ قازاقستانداعى ديپلوماتيالىق ميسسياسىنىڭ قىزمەتكەرلەرى قارسى الدى.
ەلشى ءوز كەزەگىندە قازاقستاندىقتارعا ريزاشىلىعىن ءبىلدىردى. ول سونىمەن قاتار ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 33 جىل تولۋىنا وراي ونى قىتاي باسشىسى سي تسزينپين قحر-دىڭ قر داعى 12-ءشى توتەنشە جانە وكىلەتتى ەلشىسى قىزمەتىنە تاعايىنداعانىن قۇرمەت تۇتاتىنىن اتاپ ءوتتى.
«وسىدان 33 جىل بۇرىن ەكى ەل باسشىلارىنىڭ ستراتەگيالىق باسشىلىعىمەن ديپلوماتيالىق قارىم-قاتىناس ورناتقاننان بەرى قىتاي مەن قازاقستان قارىم-قاتىناسى ۇزدىكسىز سەرپىندى دامۋعا قول جەتكىزدى. سونداي-اق تۇراقتى جان-جاقتى ستراتەگيالىق ارىپتەستىك تاريحىنداعى ەڭ جوعارى دەڭگەيگە كوتەرىلدى»، - دەدى حان چۋنلين.
سونىمەن بىرگە ەلشى قىتايدىڭ قازىر شانحاي ىنتىماقتاستىق ۇيىمىنىڭ كەزەكتى توراعاسى ەكەنىن، ال قازاقستان كەلەسى جىلى ەكىنشى «قىتاي-ورتالىق ازيا» ءسامميتىن وتكىزەتىنىن تىلگە تيەك ەتتى. چۋنلين وسىنداي ماڭىزدى ساتتە جاۋاپتى قىزمەتكە تاعايىندالۋ وعان ۇلكەن جاۋاپكەرشىلىك جۇكتەيتىنىن ايتتى.
ول ەكى مەملەكەت باسشىلارى جۇكتەگەن مىندەتتەردى ادال اتقاراتىنىن، قىتاي مەن قازاقستان قارىم-قاتىناسىنىڭ «جاڭا التىن وتىز جىلدىعىن» قۇرۋعا بەلسەندى تۇردە ۇمتىلاتىنىن باسا ايتتى.
ايتا كەتەيىك، حان چۋنلين 1970 جىلى دۇنيەگە كەلگەن. ول بۇعان دەيىن قىتاي حالىق رەسپۋبليكاسىنىڭ رۋمىنياداعى ەلشىسى (2022 جىلدىڭ مامىرىنان 2024 جىلدىڭ جەلتوقسانىنا دەيىن) قىزمەتىن اتقارعان.
ەسكە سالا كەتەيىك، 2024 جىلدىڭ 2 جەلتوقسانىندا مەملەكەت باسشىسى قىتايدىڭ قازاقستانداعى وكىلەتتى ەلشىسى چجان سياونى قابىلدادى. كەزدەسۋ بارىسىندا پرەزيدەنت چجان سياونىڭ قازاق-قىتاي دوستىعىن تابىستى دامىتۋعا، مەملەكەتارالىق بايلانىستاردى تەرەڭدەتۋگە قوسقان ۇلەسىن جوعارى باعالاپ، II دارەجەلى «دوستىق» وردەنىمەن ماراپاتتادى.
