مادەنيەت جانە اقپارات مينيسترلىگى جۋرناليستەردىڭ بەيبىت جيىنداردا جۇمىس ىستەۋ ءتارتىبىنىڭ جوباسىن جاريالادى، دەپ حابارلايدى “ادىرنا” ۇلتتىق پورتالى.
“بەيبىت جينالىستاردا بۇقارالىق اقپارات قۇرالى ءۇشىن حابارلامالار مەن ماتەريالدار جيناۋ، ولاردى وڭدەۋ جانە دايىنداۋ كەزىندە ءجۋرناليستىڭ وزىمەن بىرگە جۋرناليست كۋالىگى بولادى”، - دەپ جازىلعان قۇجاتتا.
سونداي-اق بەيبىت جيىننان حابار تاراتاتىن جۋرناليستەردىڭ ارنايى ايىرىم بەلگىلەرىن تاعىپ ءجۇرۋى كەرەگى ايتىلعان.
ول بەلگىلەر:
— الدىڭعى جانە ارتقى جاعىندا «PRESS» دەگەن جازۋى بار اشىق كوك ءتۇستى كەۋدەشە;
— قانىق سارى ءتۇستى، ورتاسىندا «PRESS» دەگەن جازۋى بار جەڭدەگى تاڭعىش;
— ورتاسىندا «PRESS» دەگەن جازۋى بار كوك ءتۇستى جاپسىرما.
فوتو: قازاقستان رەسپۋبليكاسىنىڭ مادەنيەت جانە اقپارات مينيسترلىگى
ودان بولەك، بەيبىت جيىن ءوتىپ جاتقان ەلدى مەكەننىڭ اكىمدىگى جۋرناليست جىبەرەتىن سۇراۋ نەگىزىندە جۋرناليستەردى جەدەل ءباسپاسوز ورتالىعىن ۇيىمداستىرادى. بۇقارالىق اقپارات قۇرالى بەيبىت جينالىس وتكىزىلەتىن كۇننەن ءبىر كۇن بۇرىن جۋرناليستەردىڭ سانىن كورسەتە وتىرىپ، ەركىن نىساندا سۇراۋ جىبەرەدى.
جەدەل ءباسپاسوز ورتالىعى لەنتامەن قورشالىپ، ەلەكترمەن جابدىقتالىپ، فوتو، بەينەتۇسىرىلىم جاساۋعا، سۇحبات الۋعا جەتكىلىكتى جەردەن بەلگىلەنۋى كەرەك.
دەگەنمەن، جۋرناليستەر ارنايى لەنتامەن قورشالعان جەدەل ءباسپاسوز ورتالىعىنىڭ سىرتىندا دا جۇمىس ىستەي الاتىنى ايتىلعان.
جەرگىلىكتى اكىمدىكتەر جۋرناليستەردى جەدەل ءباسپاسوز ورتالىعىنا الىپ بارۋعا، ۇيىمداستىرۋشىلارمەن جانە قاتىسۋشىلارمەن سۇحبات ۇيىمداستىرۋعا، قاۋىپسىزدىك شارالارىن تۇسىندىرۋگە مىندەتتەلەدى.
