وڭتۇستىك كورەيادا 29 جەلتوقساندا Jeju Air اۋە كومپانياسىنىڭ جولاۋشىلار ۇشاعى اپاتقا ۇشىرادى. ۇشاق بانگكوكتان مۋان حالىقارالىق اۋەجايىنا قونۋ كەزىندە ۇشۋ-قونۋ جولاعىنان شىعىپ، قورشاۋعا سوعىلعان. سالدارىنان ۇشاق ەكىگە ءبولىنىپ، ءورت شىقتى. بۇل تۋرالى قازاقستاننىڭ وسى ەلدەگى ەلشىسى قىزمەتىن اتقارعان، قازىر كورەيادا زەرتتەۋمەن اينالىساتىن حانگۋك ۋنيۆەرسيتەتىنىڭ پروفەسسورى دۋلات باقىشەۆتەن سۇراپ كوردىك.
بورتتا 181 ادام بولعان، ونىڭ ىشىندە 175 جولاۋشى جانە 6 ەكيپاج مۇشەسى. وكىنىشكە قاراي، 179 ادام قازا تاۋىپ، تەك ەكى ەكيپاج مۇشەسى امان قالدى. ولار ورتاشا جانە اۋىر جاراقاتتارمەن اۋرۋحاناعا جەتكىزىلدى. جولاۋشىلاردىڭ باسىم بولىگى وڭتۇستىك كورەيا ازاماتتارى، سونداي-اق ەكى تايلاند ازاماتى بولعان.
قازاقستاندىق ازاماتتاردىڭ ۇشاقتا بولماعانى راستالدى.
قۇتقارۋ جانە تەرگەۋ جۇمىستارىنا 720-عا جۋىق ادام تارتىلدى، ولاردىڭ قاتارىندا اۋەجاي قىزمەتكەرلەرى، ءورت سوندىرۋشىلەر، پوليتسەيلەر، اسكەري قىزمەتكەرلەر مەن جاعالاۋ كۇزەتى بار. اپاتتىڭ ناقتى سەبەپتەرى تەرگەۋ بارىسىندا انىقتالادى.
وڭتۇستىك كورەياداعى ۇشاق اپاتى اۆياتسيا تاريحىنداعى ەڭ ءىرى قايعىلى وقيعالاردىڭ ءبىرى بولىپ وتىر. تەرگەۋ ناتيجەلەرى تولىقتاي جاريالانعاننان كەيىن اپاتتىڭ ناقتى سەبەپتەرى مەن بولاشاقتا وسىنداي جاعدايلاردى بولدىرماۋ جولدارى انىقتالادى.
ال وسىدان 4 كۇن بۇرىن Azerbaijan Airlines اۋەكومپانياسىنىڭ باكۋدەن گروزنىيعا باعىت العان جولاۋشىلار ۇشاعى اپاتقا ۇشىراعان. اپات سالدارىنان 38 ادام قازا تاۋىپ، 29 ادام ءتىرى قالعان.
بۇگىنگى وقيعاعا قاتىستى 2012-2018 جىلدارى قازاقستاننىڭ كورەيا رەسپۋبليكاسىنداعى توتەنشە جانە وكىلەتتى ەلشىسى بولعان، قازىر دە وسى ەلدە عىلىمي زەرتتەۋمەن اينالىساتىن حانگۋك ۋنيۆەرسيتەتىنىڭ ورتالىق ازيا كافەدراسىنىڭ پروفەسسورى دۋلات باقىشەۆتەن كەڭىرەك بىلۋگە تىرىستىق. ءبىر ايتا كەتەرلىگى ول دا ۇشاقپەن جولاۋشىلاپ بارا جاتىر ەكەن.
- كورەياداعى ۇشاق اپاتىنىڭ الدىن الا سەبەبى قانداي؟ قانداي ۆەرسيالار ايتىلادى؟
- مۋان – پروۆينتسيادا ورنالاسقان اۋەجاي. حالىقارالىق اۋەجاي دارەجەسىن العانىنا دا كوپ ۋاقىت وتپەگەن. جاڭا رەيس. بالكىم، اۋەجايدىڭ ينفراقۇرىلىمى، قىزمەتتەرىندە كەمشىلىك بولعان شىعار. ول جەردە تاجىريبە ازداۋ دەگەندى كورەي باق - تارى ايتىپ جاتىر.
الايدا، ماماندار قونۋعا باعىت العاندا ۇشاقتىڭ موتورىنا قۇستىڭ ەنگەنىن بىلدىرەتىن بەلگىنىڭ بولعانىن دا ايتۋدا. سوندىقتان اپاتتىڭ ەگجەي - تەگجەيىن ساراپتاۋ قاجەت.
- ۇشاقتىڭ اەروپورتقا قونىپ، سوسىن سوعىلۋىنا نە سەبەپ؟
- ۇشاق ءجوندى، ورنىقتى، ياعني شتاتتى رەجىمدە قونا الماعانعا ۇقسايدى. سوندىقتان دا اۋە كەمەسى قونعان كۇيى زىمىراپ بارىپ قورشاۋعا سوعىلدى.
- بالكىم قيسىنسىزداۋ سۇراق بولار، باكۋدەن ۇشقان ۇشاق پەن كورەياداعى ۇشاق اپاتىنىڭ ۇقساستىعى بار ما؟
- ەكى اپات اراسىندا ەشبىر ۇقساستىق جوق دەگەن ويدامىن. ارينە، ماماندار، قۇرىلعان كوميسسيالار ءوز ويلارىن دايەكتى تۇردە ايتا جاتار.
- بىراق، ەڭ باستى ايىرماشىلىق: ءبىرىنشى جايت سوعىسىپ جاتقا ەلدە ورىن السا، ەكىنشىسى بەيبىت ەلدىڭ ءوز ۇشاعىنىڭ ءوز جەرىندە ءۇشىنشى تاراپتىڭ ارالاسۋىنسىز اپاتقا ۇشىراۋى بولىپ تابىلادى.
- سۇحباتىڭىزعا راقمەت!
سىمبات ناۋحان
«ادىرنا» ۇلتتىق پورتالى
