ەكس-پرەزيدەنت نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي قازاقستاننىڭ بۇرىنعى ءبىرىنشى حانىمى سارا نازارباەۆانىڭ “قايتىس بولعانى” تۋرالى اقپاراتتى جوققا شىعاردى، دەپ حابارلايدى “ادىرنا” ۇلتتىق پورتالى.
«وتاندىق باق جۋرناليستەرىنىڭ سارا الپىسقىزىنا قاتىستى ساۋالىنا جاۋاپ بەرە وتىرىپ، جەلىدە تاراعان ونىڭ قايتىس بولعانى تۋرالى اقپاراتتىڭ شىندىققا جاناسپايتىنىن مالىمدەگىم كەلەدى»، - دەپ جازدى ايدوس ۇكىباي ءوزىنىڭ X الەۋمەتتىك جەلىسىندەگى پاراقشاسىندا.
83 جاستاعى سارا نازارباەۆانىڭ قايتىس بولعانى تۋرالى اقپارات ءبىر كۇن بۇرىن پايدا بولعان ەدى.
ەسكە سالايىق، بىلتىر سارا نازارباەۆا رەسمي كۇيەۋىنىڭ فاميلياسىنان شىققانى تۋرالى اقپارات تاراعان بولاتىن.
«نۇرسۇلتان نازارباەۆ پەن سارا نازارباەۆانىڭ نەكەسى بۇزىلعانى (جانە سايكەسىنشە جاڭا وتباسىن قۇرۋ تۋرالى) تۋرالى رەسمي مالىمدەمەلەر ەشقاشان بولعان ەمەس. ال نۇرسۇلتان نازارباەۆ قورىنىڭ رەسمي سايتتارىندا جانە تۇڭعىش پرەزيدەنتتىڭ nazarbayev.kz رەسمي سايتىندا سارا الپىسقىزى ءالى كۇنگە دەيىن تۇڭعىش پرەزيدەنتتىڭ جۇبايى ەكەنى تۋرالى اقپارات كورسەتىلگەن. الايدا بىرنەشە جىلدان بەرى جاڭالىقتاردان سارا نازارباەۆا تۋرالى ەشقانداي اقپارات شىققان جوق. ونىڭ كورىنبەي كەتكەنىنە دە ءبىراز بولدى. بىلتىردان بەرى بىلىم مينيسترلىگى ونىڭ «ءوزىن-ءوزى تانۋ» ءپانىن مىندەتتى مەكتەپ باعدارلاماسىنان الىپ تاستاپ، فاكۋلتاتيۆ رەتىندە قالدىرعان بولاتىن. ءوزىن ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ قۇرامىنان شىعارىپ جىبەرگەن. بيزنەس-تىزىلىمدەرگە سايكەس، ەلىمىزدىڭ ەكس-ءبىرىنشى حانىمىنىڭ «سارا الپىسقىزى نازارباەۆا» اتتى جەكە كاسىپكەرلىگى بار. ال ونىڭ باسشىسى قوناقاي سارا الپىسقىزى دەپ كورسەتىلگەن»، - دەلىنگەن Shishkin_like Telegram ارناسى تاراتقان حابارلامادا.
قازاقستان حالىق بانكىنىڭ ءومىردى ساقتاندىرۋ بويىنشا ەنشىلەس ۇيىمى «Halyk-Life» اق فيليالىندا 2012 جىلعى 4 اقپاننان باستاپ قارجى مينيسترلىگىنىڭ قارجىلىق ەسەپتىلىك دەپوزيتاريىندە ول قوناقاەۆا بولىپ تىركەلگەن.
ال 2005 جىلى كۇيەۋ بالاسى تيمۋر قۇلىباەۆ باسقارعان «Almex Holding Group» اق-نىڭ 2005 جىلعى 19 قىركۇيەكتەگى ەنشىلەس ۇيىمدارىنىڭ تىزىمىندە ول نازارباەۆا بولىپ كورسەتىلگەن. «بوبەك» قايىرىمدىلىق قورىنىڭ نەگىزىن قالاۋشىنىڭ Instagram جەلىسىندەگى پاراقشاسى 2018 جىلدىڭ 15 ساۋىرىنەن بەرى جاڭارتىلماعان، ول جەردە ونىڭ فاميلياسى نازارباەۆا دەپ جازىلعان.
نازارباەۆتىڭ رەسمي ايەلى اتا-تەگىن 2005 جانە 2012 جىلدار ارالىعىندا الماستىردى دەگەن دە دەرەك تە كەزدەستى.
سونىمەن قاتار، نۇرسۇلتان نازارباەۆ بەيرەسمي ەكىنشى ايەلى اسەل قۇرمانباەۆا دەگەن قاۋەسەتتى راستاپ، «مەنىڭ ءومىرىم» اتتى ءومىربايان كىتابىندا جازعان بولاتىن.
“نەكە مۇسىلماننىڭ ادەت-عۇرپىمەن قيىلىپ، بۇل نەكەدەن ەكى ۇل دۇنيەگە كەلدى،"- دەپ جازادى نازارباەۆ ءوز ەستەلىگىندە.
