قورعانىس ءمينيسترى رۋسلان جاقسىلىقوۆ سپورتتىق جانە جاۋىنگەرلىك سامبو فەدەراتسياسىنىڭ پرەزيدەنتى بولىپ سايلاندى. سايلاۋ استانادا فەدەراتسيانىڭ كەزەكتەن تىس وتىرىسىندا ءوتتى، دەپ حابارلايدى “ادىرنا” ۇلتتىق پورتالى.
قورعانىس ءمينيسترىنىڭ كانديداتۋراسىنا فەدەراتسيانىڭ بارلىق مۇشەسى ءبىراۋىزدان داۋىس بەردى. وعان دەيىن بۇل قىزمەتتە ايدوس اقجانوۆ بولدى.
"فەدەراتسيا مۇشەلەرىنە ناتيجەلى جۇمىسى مەن ماعان كورسەتكەن سەنىمى ءۇشىن العىسىمدى بىلدىرەمىن. سپورتتىق جانە جاۋىنگەرلىك سامبونى اسكەري جانە قۇقىق قورعاۋ قىزمەتىندە جەكە قۇرامدى دايارلاۋ جۇيەسىنە ەنگىزۋ جوسپارلانۋدا. ءبىز سپورتتىڭ وسى ءتۇرىن، ونىڭ ىشىندە اسكەري-قولدانبالى سپورت ءتۇرى رەتىندە دامىتۋ بويىنشا اۋقىمدى جۇمىس اتقارۋىمىز كەرەك", - دەدى گەنەرال-پولكوۆنيك رۋسلان جاقسىلىقوۆ.
فەدەراتسيانىڭ جاڭا پرەزيدەنتى بولاشاقتاعى جوسپارى تۋرالى ايتتى.
"2025 جىلى سامبو تمد-عا قاتىسۋشى مەملەكەتتەردىڭ دوستىق ارميالارىنىڭ اسكەري – سپورتتىق ويىندارىنىڭ باعدارلاماسىنا جانە قازاقستان قارۋلى كۇشتەرىنىڭ سپارتاكياداسىنا ەنگىزىلەدى. جاستاردى اسكەري-پاتريوتتىق تاربيەلەۋ جەلىسى بويىنشا دامىتۋ ءۇشىن ءىس-شارالار كەشەنى جوسپارلانعان. قورعانىس ءمينيسترىنىڭ كۋبوگىنا سامبودان اشىق رەسپۋبليكالىق تۋرنير وتەدى. باۋىرجان مومىشۇلى اتىنداعى الماتى اسكەري-سپورت كوللەدجىندە سامبو بولىمشەسىن اشۋ جوسپاردا بار، وندا كوپ بالالى وتباسىلاردان شىققان بالالارعا، اسكەري قىزمەتشىلەر مەن اۋىل جاستارىنا جەڭىلدىك بەرىلەدى. جاپپاي دامۋ ماقساتىندا قارۋلى كۇشتەر قاتارىنا جاۋىنگەرلىك سامبو بويىنشا مامان-نۇسقاۋشىلاردى شاقىرامىز", - دەدى فەدەراتسيا پرەزيدەنتى.
بۇگىنگى تاڭدا سامبو بويىنشا 1100-دەن استام سەكتسيادا قىرىق مىڭنان استام ادام اينالىسادى.
ايتا كەتەيىك، قوعامدىق بىرلەستىكتىڭ جاڭا باسشىسى رۋسلان جاقسىلىقوۆ - دزيۋدودان كسرو سپورت شەبەرى، بىرنەشە دۇركىن چەمپيون، سامبو مەن دزيۋدودان رەسپۋبليكالىق جانە حالىقارالىق جارىستاردىڭ جۇلدەگەرى.
