رەسەي سۋداننىڭ قىزىل تەڭىز جاعالاۋىندا ءوز اسكەري-تەڭىز بازاسىن ورنالاستىرماق بولدى. الايدا ەل يمپەريانىڭ بۇل ۇسىنىسىنان باس تارتقان، دەپ حابارلايدى "ادىرنا" ۇلتتىق پورتالى.
The Moscow Times باسىلىمىنىڭ مالىمەتىنشە، ماسكەۋ بۇل ماقساتقا جەتۋ ءۇشىن سۋدان بيلىگىنە زاماناۋي س-400 زەنيتتى-زىمىران كەشەنىن ۇسىنعان. الايدا بۇل ۇسىنىس اقش پەن باتىس ەلدەرىنىڭ تەرىس رەاكتسياسىنان قاۋىپتەنگەندىكتەن قابىلدانباعان.
سۋدان مەن رەسەي اراسىندا قارۋ-جاراق پەن مۇناي ونىمدەرىن جەتكىزۋ جونىندە كەلىسىمدەر جاسالعان. 2023 جىلدىڭ ساۋىرىنەن قازان ايىنا دەيىن رەسەي سۋدانعا 2,8 ميلليون باررەل ديزەل مەن بەنزين ەكسپورتتاعان، بۇل سۋداننىڭ جالپى يمپورت كولەمىنىڭ شامامەن جارتىسىن قۇرايدى.
سۋدان بيلىگىنە قولداۋ كورسەتكەنىمەن، ماسكەۋ ازىرگە ەلدە تۇراقتى اسكەري-تەڭىز بازاسىن ورنالاستىرا المادى. رەسەيدىڭ سۋداندا اسكەري بازا قۇرۋ تۋرالى كەلىسسوزدەرى 2019 جىلدان بەرى جۇرگىزىلۋدە، بىراق ەلدەگى ازاماتتىق سوعىس سالدارىنان بۇل جوسپارلار جۇزەگە اسپاي قالعانى ايتىلدى.
سۋداننىڭ ازاماتتىق سوعىسى 2023 جىلدىڭ ءساۋىر ايىندا باستالدى. ەلدە بيلىك ءۇشىن كۇرەس سۋدان ارمياسى مەن جىلدام ارەكەت ەتۋ كۇشتەرى اراسىندا ءجۇرىپ جاتىر. قاقتىعىس كەزىندە ون مىڭداعان ادام قازا تاۋىپ، 11 ميلليوننان استام تۇرعىن ۇيلەرىن تاستاپ كەتۋگە ءماجبۇر بولدى.
رەسەي سۋدان ارمياسىمەن بايلانىس ورناتۋ ارقىلى ەلگە قارۋ ساتۋ جانە قىزىل تەڭىزدە اسكەري-تەڭىز بازاسىن قۇرۋ مۇمكىندىگىن كوزدەيدى. ساراپشىلاردىڭ پىكىرىنشە، رەسەيدىڭ افريكادا بازاسىن ورنالاستىرۋى سۋەتس كانالى ارقىلى وتەتىن ماڭىزدى ساۋدا جولدارىن باقىلاۋعا مۇمكىندىك بەرەدى.
سيرياداعى ازاماتتىق سوعىس پەن باشار اساد رەجيمىنىڭ السىرەۋى رەسەيدىڭ بۇل ايماقتاعى اسكەري بازالارىنىڭ بولاشاعىنا كۇمان تۋدىرادى. تارتۋس پەن حمەيميم بازالارى وپپوزيتسيا باقىلاۋىنداعى ايماقتا ورنالاسقانىمەن، قازىرگى ۋاقىتتا ولاردىڭ جۇمىسىنا قاۋىپ ءتونىپ تۇرعان جوق.
