قۇقىق قورعاۋ ۇيىمدارى سيرياداعى جاپپاي قابىرلەردە 100 مىڭنان استام ادامنىڭ دەنەسى بولۋى مۇمكىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى ABC News-كە سىلتەمە جاساپ.
اقش-تا ورنالاسقان سيريالىق قۇقىق قورعاۋ ۇيىمى – سيريالىق توتەنشە جاعدايلار بويىنشا جەدەل توپتىڭ جەتەكشىسى مۋاز مۇستافا داماسكتان سولتۇستىككە قاراي 40 شاقىرىم جەردە ورنالاسقان «ۇلكەن» قابىردە 100 مىڭنان استام ادامنىڭ دەنەسى بار ەكەنىن مالىمدەدى.
مۇستافانىڭ ايتۋىنشا، ەل-كۋتايفا اۋماعىنداعى قابىرلەر – داماسك ماڭىنداعى جەرلەۋ ورىندارى – تەرەڭدىگى 6-7 مەتر، ەنى 3-4 مەتر، ال ۇزىندىعى 50-150 مەتر بولاتىن «الىپ ورلاردان» تۇرادى. بۇل قابىرلەردە ەرلەر، ايەلدەر، بالالار جانە قارتتاردىڭ دەنەلەرى بولعان.
كۋتايفا جەرلەۋ ورنى اسكەري باقىلاۋدا بولعان اۋماقتا ورنالاسقان، ازاماتتىق كولىكتەردىڭ جۇرۋىنە تىيىم سالىنعان.
بۇگىنگە دەيىن داماسك اينالاسىندا ارقايسىسىنىڭ تەرەڭدىگى 20 مەترگە دەيىن جەتەتىن جۇزدەگەن جاپپاي قابىر تابىلدى. ونداعى دەنەلەر بىرنەشە قابات ەتىپ كومىلگەن.
باشار اساد رەجيمىنىڭ قۇلاۋى كوتەرىلىسشىلەر مەن جەرگىلىكتى تۇرعىنداردىڭ اتاقتى تۇرمەلەردى بوساتۋىنا اكەلدى. قازىرگى تاڭدا 100 مىڭنان استام ادام ءىز-ءتۇزسىز جوعالعاندار قاتارىندا.
كوتەرىلىسشىلەر باسقاراتىن سيريانىڭ وتپەلى ۇكىمەتى، ۇكىمەتتىك ەمەس ۇيىمدار مەن قۇتقارۋشىلار 2011 جىلدان بەرى سيريادا ءىز-ءتۇزسىز جوعالعان ادامداردىڭ دەنەلەرى تابىلۋى مۇمكىن كەڭ اۋقىمدى تۇرمە جانە جاپپاي جەرلەۋ ورىندارىنىڭ جەلىسىن اشۋدا.
«حايات تاحرير اش-شام» كوتەرىلىسشىلەر توبىنىڭ جەتەكشىسى يدليبتەن وڭتۇستىككە قاراي داماسكقا باعىتتالعان شابۋىلدان كەيىن بەرگەن مالىمدەمەسىندە، اساد بيلىگى كەزىندە ادام قۇقىقتارىن بۇزۋ ىسىنە قاتىسى بارلاردىڭ بارلىعى جاۋاپقا تارتىلاتىنىن ايتتى.
دۇيسەنبى كۇنى سيريادان قاشىپ شىققاننان كەيىنگى العاشقى مالىمدەمەسىندە باشار اساد ءوز رەجيمىنىڭ قۇلاۋىنا «تەرروريستەردىڭ شابۋىلىن» كىنالادى.
اساد ازاماتتىق سوعىس باستالعان 2011 جىلدان بەرى ادام قۇقىقتارىنىڭ بۇزىلۋىنا قاتىستى وپپوزيتسيا مەن باتىس ەلدەرىنىڭ ايىپتاۋلارىنا تۇسىنىكتەمە بەرگەن جوق.
