جۋرناليست دۋمان مۇحاممەدكارىمنىڭ تۇرمەگە اۋىستىرىلماۋىنا بايلانىستى نارازىلىعى ۋشىعۋدا، دەپ حابارلايدى "ادىرنا" ۇلتتىق پورتالى.
جۋرناليست دۋمان مۇحاممەدكارىم الماتى وبلىسىنداعى زارەچنىي تۇرمەسىنە اۋىستىرىلماۋىنا نارازىلىق تانىتىپ، دەنەسىن تىلگەننەن كەيىن اشتىق جاريالادى.
ءجۋرناليستىڭ ادۆوكاتى عالىم نۇرپەيىسوۆتىڭ ايتۋىنشا، دۋمان مۇحاممەدكارىمدى تالدىقورعانداعى تەرگەۋ يزولياتورىندا ەكى كۇن بويى سۋىق كارتسەردە جىلى كيىمسىز، بەتون ەدەندە ۇستاعان. قۇقىق قورعاۋشىنىڭ مالىمدەۋىنشە، بۇل زاڭسىز ارەكەت ونىڭ كليەنتىنىڭ قۇقىعىن ورەسكەل بۇزۋ بولىپ تابىلادى.
ءجۋرناليستىڭ اپەللياتسيالىق شاعىمى وزگەرىسسىز قالدىرىلعاننان كەيىن ونى زارەچنىي تۇرمەسىنە اۋىستىرۋ قاجەت بولعان، ويتكەنى زاڭ بويىنشا سوتتالۋشى ءوزى تۇراتىن ايماقتا جازاسىن وتەۋى كەرەك. الايدا، ادۆوكاتتىڭ سوزىنە قاراعاندا، دۋمان مۇحاممەدكارىمدى تالدىقورعانعا "قۇجاتتاردى العاننان كەيىن زارەچنىيعا اۋىستىرامىز" دەپ الداپ اپارىپ، كامەراعا قاماعان. تۇرمەگە اۋىستىرۋدى تالاپ ەتكەن مۇحاممەدكارىمگە قىسىم كورسەتىلىپ، كارتسەرگە جابىلعان.
قازىرگى ۋاقىتتا جۋرناليست وزىنە جاسالعان زاڭسىزدىقتارعا قارسىلىق ءبىلدىرۋ ءۇشىن اشتىق جاريالاپ وتىر. بۇل وقيعا قوعامدا كەڭ تالقىلانىپ، ازاماتتىق قوعام وكىلدەرى مەن قۇقىق قورعاۋشىلار تاراپىنان الاڭداۋشىلىق تۋدىردى.
دۋمان مۇحاممەدكارىمنىڭ جاعدايى مەن وعان كورسەتىلىپ جاتقان قىسىم تۋرالى تولىققاندى مالىمەت الۋ ءۇشىن قۇقىق قورعاۋ ورگاندارىنا جۇگىنگەن ادۆوكات ونىڭ قۇقىعىن قورعاۋ ءۇشىن بارلىق زاڭدى شارالاردى قولداناتىنىن جەتكىزدى.
