تبيليسيدە نارازىلىق اكتسياسىنا قاتىسۋشىلار گرۋزيا پارلامەنت عيماراتىنا وت قويدى. زارداپ شەككەندەر تۋرالى اقپارات ازىرگە بەلگىسىز، دەپ حابارلايدى "ادىرنا" ۇلتتىق پورتالى APA.AZ باسىلىمىنا سىلتەپ.
وسى وقيعادان ءبىراز ۋاقىت بۇرىن گرۋزيا ءىىم ءباسپاسوز قىزمەتى دەمونسترانتتار پارلامەنت عيماراتىنىڭ شامامەن 10 تەرەزەسىن سىندىرعانىن حابارلاعان. سونىمەن قاتار، نارازىلىق بىلدىرۋشىلەر تاستار مەن باسقا دا زاتتاردى پايدالانىپ، عيماراتتىڭ تەمىر قورشاۋلارىن بۇلدىرگەن.
وقيعا ورنىندا بىرنەشە بۇقارالىق اقپارات قۇرالدارىنىڭ وكىلدەرى جۇمىس ىستەۋدە.
بۇل وپپوزيتسيانىڭ نارازىلىق اكتسياسى گرۋزيانىڭ پرەمەر-ءمينيسترى يراكلي كوباحيدزەنىڭ 2028 جىلعا دەيىن ەو-عا مۇشە بولۋ جونىندەگى كەلىسسوزدەردى باستاۋ ماسەلەسىن توقتاتۋ تۋرالى شەشىمىن جاريالاعاننان كەيىن، 28 قاراشادا باستالدى.
جۇماعا قاراعان ءتۇنى ارنايى جاساق نارازىلىق بىلدىرۋشىلەردى سۋ اتقىشتاردى قولدانۋ ارقىلى تاراتىپ جىبەردى.
كەيىنىرەك تبيليسيدە ەكى كۇندىك نارازىلىق اكتسيالارى كەزىندە 100-دەن استام ادامنىڭ ۇستالعانى بەلگىلى بولدى.
گرۋزيانىڭ قازىرگى پرەزيدەنتى سالومە زۋرابيشۆيلي مانداتىنىڭ مەرزىمى اياقتالعانىنا قاراماستان، ءوز وكىلەتتىگىنەن باس تارتپايتىنىن مالىمدەدى.
