29 قاراشا كۇنى قازاق ۇلتتىق قىزدار پەداگوگيكالىق ۋنيۆەرسيتەتىندە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى اسحات ايماعامبەتوۆپەن كەزدەسۋ ءوتتى.
كەزدەسۋگە باسقارما توراعاسى – رەكتورى گۇلميرا قاناي، ۋنيۆەرسيتەتتىڭ پروفەسسورلىق-وقىتۋشىلىق قۇرامى، ستۋدەنتتەر، ماگيسترانتتار جانە دوكتورانتتار قاتىستى.
شارانىڭ باستى ماقساتى – جوعارى ءبىلىم بەرۋ سالاسىنداعى وزەكتى ماسەلەلەردى تالقىلاۋ، پەداگوگيكا جانە ءبىلىم بەرۋ سالاسىنداعى رەفورمالاردى جەتىلدىرۋ جولدارىن قاراستىرۋ، سونداي-اق زاڭنامالىق دەڭگەيدە ءبىلىم ساپاسىن ارتتىرۋعا باعىتتالعان ۇسىنىستاردى تىڭداۋ.
«قازاق ۇلتتىق قىزدار پەداگوگيكالىق ۋنيۆەرسيتەتىن 80 جىلدىق مەرەيتويىمەن شىن جۇرەكتەن قۇتتىقتايمىن. بۇل كۇنگە ۇلكەن دارەجەدە، ابىرويمەن جەتكەنىنە كۋا بولىپ وتىرمىن. ءبىلىم الۋعا بارلىق مۇمكىندىك جاسالعان. ۋنيۆەرسيتەتتىڭ ءبىلىم بەرۋ مازمۇنى دا، ماتەريالدىق-تەحنيكالىق بازاسى دا جاڭارعان. پەداگوگيكالىق ماماندىقتى تاڭداعان ۇزدىك، مىقتى، كوزى جانىپ تۇرعان جاستار وسى ۋنيۆەرسيتەتكە ءتۇسىپ جاتىر. بۇل – ەلىمىزدىڭ ءارى قاراي دامۋىن بىلدىرەدى، سەنىم ۇيالاتادى»، – دەدى قر پارلامەنتى ءماجىلىسىنىڭ دەپۋتاتى اسحات ايماعامبەتوۆ.
جيىندا پەداگوگيكالىق ەتيكا، اكامەديالىق ادالدىق، سونىمەن قاتار جوعارى ءبىلىم بەرۋ سالاسىنداعى وزەكتى ماسەلەلەر جان-جاقتى تالقىلاندى.
ەركىن فورماتتا وتكەن كەزدەسۋدە جاستار وزدەرىن تولعاندىرعان ماسەلەلەردى قوزعادى. قاتىسۋشىلار ءماجىلىس دەپۋتاتىنا كوكەيكەستى سۇراقتارىن قويىپ، ناقتى جاۋاپتار الدى.
«بۇگىنگى كەزدەسۋدە قر پارلامەنتى ءماجىلىسىنىڭ دەپۋتاتى اسحات ايماعامبەتوۆكە ءوزىمدى تولعاندىرعان سۇراقتى قويدىم. مەنى الاڭداتقان سۇراق ايماقتارداعى ءبىلىم بەرۋ ساپاسىن جاقسارتۋ ماسەلەسى بولدى. اسحات قاناتۇلى اۋىل بالالارىنىڭ ءبىلىم ساپاسىن قولداۋ ماقساتىندا بىرقاتار جوبا بار ەكەنىن ايتتى. سۇراعىما ناقتى جاۋاپ العانىما قۋانىشتىمىن»، – دەدى فيلولوگيا ينستيتۋتىنىڭ «شەتەل ءتىلى: ەكى شەتەل ءتىلى» ءبىلىم بەرۋ باعدارلاماسىنىڭ 4 كۋرس ستۋدەنتى اجەنوۆا ۇلدامەت باحىتقىزى.
كەزدەسۋ اياسىندا ءماجىلىس دەپۋتاتى اسحات ايماعامبەتوۆ سەرالى قانيەۆ اتىنداعى قازاق ۇلتتىق قىزدار پەداگوگيكالىق ۋنيۆەرسيتەتتىڭ عىلىمي كىتاپحاناسى مەن باسقا دا جاڭا ماڭىزدى نىسانداردى ارالاپ، ءبىلىم ورداسىنىڭ تىنىس-تىرشىلىگىمەن تانىستى. سونىمەن قاتار ۋنيۆەرسيتەتتىڭ الداعى ۋاقىتتا دا ساپالى ءبىلىم بەرۋ ىسىندەگى ءرولىنىڭ ارتا تۇسەتىنىنە سەنىم ءبىلدىردى.
