قىتايدىڭ تاكلا-ماكان ءشولى، «ءولىم تەڭىزى» دەگەن اتاۋمەن تانىمال، ەندى تولىقتاي قۇم كوشكىنىن توقتاتاتىن جاسىل جولاقپەن قورشالدى. بۇل تۋرالى قىتايلىق سينحۋا اقپارات اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
قىتايدىڭ سولتۇستىك-باتىسىنداعى سينتسزيان-ۇيعىر اۆتونوميالىق اۋدانىنىڭ بيلىگىنىڭ مالىمەتىنشە، ءشولدىڭ ۇزىندىعى 3 046 شاقىرىمدى قۇرايدى.
بەيسەنبى تاڭەرتەڭ يۋيتيان اۋدانىنىڭ وڭتۇستىك بولىگىندەگى قۇمدى اۋماققا ەۆفرات تەرەكتەرى، زايسان سەكسەۋىلدەرى، جاپىراقتى تالدار سياقتى بىرنەشە وسىمدىك تۇرلەرى وتىرعىزىلدى. بۇل سينتسزيان-ۇيعىر اۆتونوميالىق اۋدانىنىڭ ورمان جانە دالا شارۋاشىلىعى باسقارماسىنىڭ مالىمەتىنشە، «جاسىل بەلدەۋدىڭ» سوڭعى بولىگىن سالۋدى اياقتاۋدى بىلدىرەدى.
تاكلا-ماكان ءشولىنىڭ اۋماعى 337 600 شارشى شاقىرىمدى قۇرايدى، ال اينالاسىنىڭ ۇزىندىعى 3 046 شاقىرىم. بۇل ونى قىتايداعى ەڭ ۇلكەن ءشول جانە الەمدەگى ەكىنشى ءىرى جىلجىمالى ءشول ەتەدى.
ەسكە سالساق، قازاقستان مەن قىتاي ترانسشەكارالىق وزەندەردىڭ سۋىن ەكى ەل اراسىندا ءبولىسۋ تۋرالى ۇكىمەتارالىق كەلىسىم جوباسىن ازىرلەگەلى جاتقانى تۋرالى حابارلانعان بولاتىن. بۇل تۋرالى 2024 جىلدىڭ 19 تامىزىندا قر سۋ رەسۋرستارى جانە يرريگاتسيا مينيسترلىگى مالىمدەگەن.
اقپاراتقا سايكەس، قۇجاتتى ازىرلەۋمەن ەكى ەلدىڭ ماماندارى كىرەتىن بىرلەسكەن جۇمىس توبى اينالىسۋدا. كەلىسىمدى ازىرلەۋدىڭ نەگىزگى ماقساتى – بالقاش كولىن وڭتايلى دەڭگەيدە ساقتاۋعا كەپىلدىك بەرەتىن سۋ كولەمىنىڭ كەلۋىن قامتاماسىز ەتۋ.
ايتا كەتسەك، ەكى ەل اراسىنداعى ترانسشەكارالىق وزەن - ىلە. ال بالقاش كولىنە قۇياتىن سۋدىڭ 80%-ى ىلە وزەنىنەن كەلەدى. قىتاي ءشولىن سۋارىپ الەك، ال ەكولوگتار بالقاش كولى تارتىلىپ بارادى، دەپ دابىل قاعۋدا.
