ەگەر ۋكرايناعا يادرولىق قارۋ بەرىلسە، رەسەي دەرەۋ بارلىق ىقتيمال سوققى قۇرالدارىن قولداناتىنىن ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى رف پرەزيدەنتى ۆلاديمير پۋتين قازاقستانعا مەملەكەتتىك ساپارىن قورىتىندىلاي وتىرىپ مالىمدەدى.
«سىزدەر قالاي ويلايسىزدار — اقىلعا قونىمدى تۇرعىدا، — ءبىز قازىر ءىس جۇزىندە سوعىسىپ جاتقان مەملەكەت يادرولىق دەرجاۆاعا اينالسا، ءبىز نە ىستەۋىمىز كەرەك؟ بۇل جاعدايدا رەسەيدىڭ قولىنداعى بارلىق قۇرالداردى — مەن مۇنى ەرەكشە اتاپ وتكىم كەلەدى، — ءدال بارلىق سوققى قۇرالدارىن قولدانۋىمىز كەرەك بولادى. بارلىعىن»، – دەپ مالىمدەدى رف پرەزيدەنتى.
رەسەي باسشىسى سونداي-اق ۋكرايناعا يادرولىق قارۋ بەرۋ ستسەناريىنە جول بەرىلمەيتىنىن اتاپ ءوتتى.
«ۋكرايناعا يادرولىق قارۋ بەرۋ تۋرالى تەك جاۋاپسىز ادامدار ايتا الادى»، - دەدى.
بۇعان دەيىن New York Times گازەتى اقش پەن ەۋروپانىڭ كەيبىر شەنەۋنىكتەرى ۋكرايناعا يادرولىق قارۋ بەرۋ نەمەسە ەل اۋماعىندا كونۆەنتسيالىق قارۋ قورلارىن ورنالاستىرۋ مۇمكىندىگىن تالقىلاعانىن حابارلاعان ەدى.
بۇل يدەياعا رف قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ «مۇنداي ۇسىنىس اۆتورلارى پارانويامەن اۋىرادى» دەپ جاۋاپ بەردى. ال رەسەيدىڭ سىرتقى ىستەر مينيسترلىگى مۇنداي قادام جانجالدىڭ باقىلاۋسىز ۋشىعۋىنا الىپ كەلۋى مۇمكىن ەكەنىن ەسكەرتتى.
