ليتۆانىڭ ۆيلنيۋس اۋەجايى ماڭىندا DHL كومپانياسىنىڭ جۇك ۇشاعى اپاتقا ۇشىرادى. سالدارىنان ەكيپاج مۇشەلەرىنىڭ ءبىرى قازا تاپتى. گەرمانيا بۇل اپاتقا سىرتقى كۇشتەردىڭ قاتىسى بولۋى مۇمكىن ەكەنىن جوققا شىعارمايدى، دەپ حابارلايدى “ادىرنا” ۇلتتىق پورتالى.
“گولوس امەريكي” باسىلىمىنىڭ اقپاراتىنا سايكەس، وقيعا دۇيسەنبى كۇنى، 25 قاراشادا بولعان.
بيلىك بۇل وقيعانى جاقىندا بولعان ديۆەرسيا ارەكەتتەرىمەن بايلانىستىرمادى. دەگەنمەن، سوڭعى بىرنەشە اپتادا ليتۆادا جۇك ۇشاقتارىنا ءورت قويۋ قۇرىلعىلارى ورناتىلۋىنا بايلانىستى ىقتيمال وقيعالاردى تەرگەۋ جۇرگىزىلگەن.
پوليتسيا مەن DHL كومپانياسىنىڭ مالىمەتىنشە، لەيپتسيگتەن كەلگەن ۇشاق اۋەجايدان شامامەن ءبىر شاقىرىم جەردە قۇلاپ، بىرنەشە عيماراتقا سوعىلعان. ۇشاق بىرنەشە ءجۇز مەترگە ۇشىپ، باسقارۋدان شىعىپ كەتكەن.
اپات بولعان جەردەن تۇسىرىلگەن سۋرەتتەردە ۇشاق سىنىقتارى مەن ورتكە ورانعان پاكەتتەر كورىنەدى. ولار قالالىق اۋماقتاعى ءبىر بولىكتە شاشىلىپ، توتەنشە جاعداي قىزمەتكەرلەرى ايماقتى قورشاۋعا العان.
«بۇل ديۆەرسيا نەمەسە تەراكت بولدى دەگەن بەلگىلەر نەمەسە دالەلدەر ازىرگە جوق»، – دەدى قورعانىس ءمينيسترى لاۋريناس كاششيۋناس جۋرناليستەرگە.
ول تەرگەۋ سەبەپتى انىقتاۋ ءۇشىن شامامەن ءبىر اپتاعا سوزىلۋى مۇمكىن ەكەنىن ايتتى.
مەملەكەتتىك قاۋىپسىزدىك دەپارتامەنتىنىڭ باسشىسى داريۋس ياۋنيشكيس ليتۆادا «رەسەيدىڭ بارعان سايىن اگرەسسيۆتى ارەكەتتەرىن» باقىلاپ وتىرعانىن جانە «تەراكت بولۋى مۇمكىندىگىن جوققا شىعارا المايتىنىن» ايتتى. بىراق وقيعاعا بىرەۋدىڭ قاتىسى بار ەكەنىن دالەلدەۋ ازىرگە مۇمكىن ەمەس ەكەنىن جەتكىزدى.
ليتۆانىڭ پرەمەر-ءمينيسترى ينگريدا شيمونيتە الەۋمەتتىك جەلىدە جاريالانعان مالىمدەمەسىندە تەرگەۋ كەزىندە «جىلدام تۇجىرىمداردان اۋلاق بولۋعا» شاقىردى.
الايدا گەرمانيانىڭ سىرتقى ىستەر ءمينيسترى اننالەنا بەربوك: «ەندى بۇل نە بولعانىن انىقتاپ، وزىمىزگە سۇراق قويۋىمىز كەرەك: بۇل جاي عانا اپات پا، الدە تاعى ءبىر گيبريدتى وقيعا ما؟» – دەدى.
پوليتسيانىڭ مالىمەتىنشە، ۇشاق بىرنەشە ءجۇز مەتر ۇشىپ، تۇرعىن ۇيگە سوعىلعان. كەيىن تاعى بىرنەشە شاعىن عيماراتتار مەن اۆتوكولىككە سوققان.
ءورت سوندىرۋشىلەردىڭ ايتۋىنشا، اپات سالدارىنان ەكيپاج مۇشەلەرىنىڭ تورتەۋىنىڭ ءبىرى قازا تاپقان.
پوليتسيانىڭ مالىمەتىنشە، قازا تاپقان ەكيپاج مۇشەسى يسپاندىق بولعان، ال قالعان ءۇش ەكيپاج مۇشەسى يسپانيا، گەرمانيا جانە ليتۆا ازاماتتارى. ولاردىڭ بىرەۋى اۋىر جاراقات العان.
توتەنشە قىزمەت وكىلدەرى ۇشاق سوعىلعان ءۇيدىڭ تۇرعىندارى ەۆاكۋاتسيالانعانىن حابارلادى. ۇيدە تۇراتىن 12 ادام قاۋىپسىز جەرگە كوشىرىلگەن.
«ءبىزدى جارىلىس داۋسى وياتتى. تەرەزەدەن جارىلىستار تولقىنى مەن وت بۇلتىن كوردىك. فەيەرۆەركتەي بولدى»، – دەدى اپات ورنىنا جاقىن تۇراتىن ستانيسلوۆاس ياكيماۆيچيۋس France Presse اگەنتتىگىنە ايتتى.
DHL كومپانياسى ۇشاقتى ونىڭ سەرىكتەسى SwiftAir پايدالانعانىن جانە ۇشاق «اپاتتى جاعدايدا قونۋعا» ارەكەت جاساعانىن مالىمدەدى.
گەرمانيانىڭ كولىك مينيسترلىگىنىڭ وكىلى ەلدىڭ اۆياتسيالىق وقيعالاردى زەرتتەۋ بيۋروسى اپات ورنىندا جۇرگىزىلىپ جاتقان تەرگەۋگە قولداۋ كورسەتەتىنىن ايتتى.
اپاتتىڭ ناقتى سەبەبى ءالى انىقتالماعان. بۇعان دەيىن وسى ايدا ليتۆادا باتىس ەلدەرىنە باعىتتالعان ۇشاقتارعا ءورت قويۋ قۇرىلعىلارىن جىبەرۋگە بايلانىستى قىلمىستىق ءىس بويىنشا قاماۋعا الۋلار جۇرگىزىلگەن بولاتىن.
پولشا جانە ليتۆا باق-تارىنىڭ مالىمەتىنشە، شىلدە ايىندا ليتۆادان ۇلىبريتانياعا وتقا قاۋىپتى زاتتارى بار ەلەكتر ماسساجەرلەر سەكىلدى قۇرىلعىلار جىبەرىلگەن. بۇل قۇرىلعىلار ۆارشاۆا ماڭىندا جۇك كولىگىنىڭ ورتەنۋىنە بايلانىستى بولۋى مۇمكىن.
ۇلىبريتانيانىڭ انتيتەررورلىق پوليتسياسى وتكەن ايدا گەرمانيادا بولعان ۇقساس جاعدايدان كەيىن جىل باسىندا قويمادا سالەمدەمەنىڭ ورتەنۋىن تەرگەپ جاتقانىن حابارلادى.
ليتۆا پرەزيدەنتىنىڭ قاۋىپسىزدىك جونىندەگى باس كەڭەسشىسى بۇل وقيعالارعا رەسەيدىڭ قاتىسى بار دەپ ايىپتادى.
«ءبىز بۇل وپەراتسيالاردىڭ قايدان شىققانىن بىلەمىز. بۇل – رەسەيدىڭ اسكەري بارلاۋ قىزمەتى»، – دەدى كەستۋتيس بۋدريس Ziniu راديوسىنا بەرگەن سۇحباتىندا.
«ءبىز مۇنى جاۋاپسىز قالدىرا المايمىز، ويتكەنى بۇل ودان دا جاڭا ارەكەتتەرگە اكەلۋى مۇمكىن»، – دەپ قوستى ول.
