قىزىلوردادا سۋ رەسۋرستارىن ءتيىمدى باسقارۋ ادىستەرى كەڭىنەن ەنگىزىلىپ جاتقانىن ورتالىق كوممۋنيكاتسيالار قىزمەتىنىڭ بريفينگىندە قىزىلوردا وبلىسىنىڭ اكىمى نۇرلىبەك نالىباەۆ باياندادى.
مەملەكەت باسشىسىنىڭ، ۇكىمەتتىڭ قولداۋىمەن دەر كەزىندە جۇرگىزىلگەن كەلىسسوزدەر ارقاسىندا بيىل ەگىس القاپتارى سۋمەن تولىق قامتاماسىز ەتىلدى، ايماقتا سۋ تاپشىلىعى بولعان جوق.
اۋىل شارۋاشىلىعىنا سوڭعى 2 جىلدا 20,3 ملرد. تەڭگەدەن استام ينۆەستيتسيا تارتىلدى. وتكەن 10 ايدا نەگىزگى كاپيتالعا 12,2 ملرد. تەڭگە ينۆەستيتسيا سالىندى.
«اگرارلىق ايماق سانالاتىن قىزىلوردا وبلىسى ءۇشىن سۋارمالى سۋ ماسەلەسى قاشاندا وزەكتى. بيىل 189 مىڭ 449 گەكتارعا اۋىل شارۋاشىلىعى داقىلدارى ەگىلىپ، اگروتەحنيكالىق تالاپتارعا ساي مەرزىمىندە تولىق جينالدى. وندىرىستە ىلعال ۇنەمدەيتىن تەحنولوگيالار قولدانۋ قارقىندى دامىپ كەلەدى. جاڭا تەحنولوگيالاردى پايدالانۋ كولەمى 4 مىڭ 400 گەكتارعا جەتكىزىلدى. بۇل وتكەن جىلمەن سالىستىرعاندا 5 ەسە ارتىق»، - دەدى وبلىس اكىمى.
مەملەكەت باسشىسىنىڭ قولداۋىمەن باستاۋ العان «كەڭ دالا-2» باعدارلاماسى ديقان قاۋىمى ءۇشىن قولايلى بولدى.
ەسكە سالساق، سوڭعى جىلدارى سىر ديقاندارى 55 مىڭ گەكتار كۇرىش ەگىستىگىن لازەرمەن تەگىستەدى. ناتيجەسىندە سۋدى ۇنەمدەپ، ونىمدىلىكتى 30 پايىزعا ارتتىردى.
