ابحازيانىڭ پرەزيدەنتى اسلان بجانيا وپپوزيتسيانىڭ قىسىمىنان كەيىن ورنىن بوساتۋعا ءماجبۇر بولدى. سونداي-اق پارلامەنتتى باسىپ العان وپپوزيتسيامەن كەلىسىمگە سايكەس، ۇكىمەت باسشىسى دا وتستاۆكاعا كەتەتىن بولدى، دەپ حابارلايدى “ادىرنا” ۇلتتىق پورتالى.
"ەلدەگى تۇراقتىلىق پەن كونستيتۋتسيالىق ءتارتىپتى ساقتاۋ ماقساتىندا ابحازيا رەسپۋبليكاسىنىڭ كونستيتۋتسياسىنىڭ 63-بابىنا سايكەس، ابحازيا رەسپۋبليكاسىنىڭ پرەزيدەنتى قىزمەتىنەن كەتۋ تۋرالى شەشىم قابىلدادىم،" – دەپ جازدى بجانيا ءوزىنىڭ وتستاۆكا تۋرالى مالىمدەمەسىندە.
وپپوزيتسيا كوشباسشىلارىنىڭ ءبىرى ادگۋر اردزينبانىڭ ايتۋىنشا، پرەزيدەنت بجانيا مەن پرەمەر-مينيستر الەكساندر انكۆابتىڭ وتستاۆكاسى تۋرالى شەشىم بيلىك پەن وپپوزيتسيا اراسىنداعى كەلىسسوزدەر ناتيجەسىندە قابىلدانعان.
ينتەرفاكس اگەنتتىگىنىڭ مالىمەتىنشە، پرەزيدەنتتىڭ مىندەتىن ۋاقىتشا ۆيتسە-پرەزيدەنت بادرا گۋنبا اتقارادى. پرەمەر-ءمينيستردىڭ مىندەتىن بۇرىن وسى قىزمەتتى اتقارعان ۆالەري بگانبا ورىندايدى.
بجانيا قىزمەتىنەن كەتۋگە سەنبى كۇنى، پارلامەنت عيماراتىن باسىپ العان نارازىلىق بىلدىرۋشىلەردەن كەيىن كەلىستى. ابحازيا استاناسىندا تولقۋلار ءبىر اپتا بۇرىن باستالعان.
نارازىلىقتار جاڭا ينۆەستيتسيالىق كەلىسىمنىڭ قابىلدانۋىنا بايلانىستى شىقتى. كوپتەگەن تۇرعىندار رەسەيلىك بيزنەستىڭ ەلدەگى ىقپالىنىڭ ارتۋى تۋريزمنەن تۇسەتىن تابىستارىن ازايتادى دەپ الاڭداعان.
