الەۋمەتتىك جەلى بەتىندە «جازۋشىلار وداعىنىڭ استانا قالاسى فيلالى تاراتىلىپ، ونىڭ باسشىسى داۋلەتكەرەي كاپۇلى قىزمەتتەن الىنادى» دەگەن پوستار ءجيى تارادى. سودان بەرى 3 كۇن وتكەندە قازاقستان جازۋشىلار وداعىنىڭ توراعاسى مەرەكە قۇلكەنوۆ داۋلەتكەرەيدى ورنىنان الۋ تۋرالى اڭگىمە بولماعانىن ەندى ايتتى، دەپ حابارلايدى “ادىرنا” ۇلتتىق پورتالى.
“جاس الاش” گازەتىنە بەرگەن سۇحباتىندا مەرەكە قۇلكەنوۆ داۋلەتكەرەي كاپۇلىنىڭ قىزمەتىنەن الۋ تۋرالى اقپارات جالعان ەكەنىن ايتادى.
«داۋلەتكەرەيدى ورنىنان الۋ تۋرالى اڭگىمە بولعان جوق. بۇل وتىرىك اڭگىمە. داۋلەتكەرەي جۇمىسىن ىستەپ وتىر. ونى جۇمىستان كەتىرۋ تۋرالى ەشقانداي بۇيرىق شىققان جوق. ەندى حات تۋرالى ايتايىن. د.ابدىكۇلى، ق.سالعاراۇلى، ق.جيەنباي، س.ءابدىراحمانوۆ قاتارلى قالامگەرلەر ءبىر حات جازىپ قول قويىپتى، بىراق ول حات ەش جەردە جاريالانعان جوق، مەنىڭ قولىمدا. وسى حاتتا وداقتىڭ تۇتاستىعىن ساقتاۋىمىز كەرەك دەگەن عانا وي ايتىلعان. وسىعان دەيىن بىرەۋلەر بىقسىپ، «استانادان ءبىر جازۋشىلار وداعىن اشساق» دەپ الەۋمەتتىك جەلىلەردە جازبا جازعان بولاتىن. ارينە، مۇنداي پىكىردى ولار تىكەلەي ايتپاسا دا، جازبا استىندا بىرەۋلەرگە سونداي پىكىر جازدىرىپ وتىرعانى بايقالادى”، دەيدى مەرەكە قۇلكەنوۆ.
سونداي-اق، وبلىستىق فيليالداردى جابۋ تۋرالى سىبىسقا دا جاۋاپ بەردى.
«وبلىستىق فيليالداردى جاۋىپ، ونىڭ ورنىن وكىلدىككە اۋىستىرۋ تۋرالى دا ايتىلىپ جاتىر. مۇنى دا تۇسىندىرە كەتەيىن. وسىعان دەيىن وڭىرلەردە وداقتىڭ فيليالدارى بولدى. ولار وداقتىڭ اتىنان قۇزىرەتتى ورىندارعا «مىنانى ىستەپ بەر» دەپ حات جازاتىن. سويتەدى دە، ولار بارلىق قارجىنى وزدەرىنىڭ جەكە جك-سىنا اۋدارتىپ الادى. مەن وداق باسشىلىعىنا كەلگەلى فيليالداردان وداققا ءبىر تيىن اقشا تۇسكەن جوق. نەگىزى فيليالدار جەرگىلىكتى جەردە ءبىزدىڭ جاعدايىمىزدى جاساۋ كەرەك قوي، بىراق ولاي بولماي تۇر. سوندىقتان مەن ونى وكىلەتتى قىلىپ، جۇمىستار وداقتىڭ شەشىمىمەن جاسالسا دەگەن وي بولاتىن. قازىر قايتادان ويلانىپ وتىرمىز، مۇمكىن باسقاشا جاسايتىن شىعارمىز. نەگىزى فيليال دا، وكىلدىك تە وداق ءۇشىن، وداقتىڭ ابىرويى ءۇشىن، وداقتىڭ قارجىسىن كوبەيتۋ ءۇشىن جۇمىس جاساۋ كەرەك. ايتپەسە، ونى نەگە قۇردىق.
«فيليالدى جابۋدى وداق توراعاسى شەشە المايدى، ول ءۇشىن سەزد ءوتۋى كەرەك» دەپ ايتىلىپ جاتىر. جارعىنىڭ 2, 7, 4-تارماعى نەگىزىندە فيليالداردى قۇرۋ تۋرالى شەشىم سەزدىڭ قۇزىرىندا دەگەن ءسوز بار. سونىمەن قاتار جارعىنىڭ 6-تارماعىنا سايكەس قاجەتىنە قاراي جازۋشىلار وداعى وكىلدىكتەرىن، اۋماقتىق بولىمشەلەرىن قۇرۋعا قۇقىلى دەگەن دە ءسوز بار. كوردىڭىز بە، بىلاي دا، بىلاي دا كەلىپ تۇر. وسىعان دەيىن جارعىداعى جازىلىمعا سايكەس ەشقاشان سەزدە فيليال قۇرۋ جونىندە شەشىم شىقپاعان»، – دەدى م.قۇلكەنوۆ.
