قازاقستان پرەمەر-ءمينيسترى اتوم ەنەرگەتيكاسى جانە جوعارى تەحنولوگيالار سالاسىنداعى ىنتىماقتاستىقتى تالقىلاۋ ءۇشىن «روساتوم» كورپوراتسياسىنىڭ باس ديرەكتورىمەن كەزدەستى، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
ولجاس بەكتەنوۆ پەن الەكسەي ليحاچەۆ كەزدەسىپ، اتوم ەنەرگەتيكاسى ماسەلەلەرىن تالقىلادى.
«ولجاس بەكتەنوۆ اتوم ەنەرگياسى جونىندەگى مەملەكەتتىك كورپوراتسيا «روساتومنىڭ» باس ديرەكتورى الەكسەي ليحاچەۆپەن كەزدەسۋ وتكىزدى»، – دەلىنگەن ۇكىمەت تاراتقان حابارلامادا.
كەزدەسۋ بارىسىندا ولجاس بەكتەنوۆ پەن الەكسەي ليحاچەۆ اتوم ەنەرگەتيكاسى، كۆانتتىق تەحنولوگيالار جانە تسيفرلاندىرۋ سياقتى سالالارداعى سەرىكتەستىك مۇمكىندىكتەرىن تالقىلادى.
ەرەكشە نازار قۇزىرەتتەرمەن الماسۋعا، كادرلىق الەۋەتتى دامىتۋعا جانە وزىق تەحنولوگيالاردى زەرتتەۋگە اۋدارىلدى.
سونداي-اق، رەسمي مالىمەتتە كەزدەسۋدە حالىقارالىق ىنتىماقتاستىقتىڭ پەرسپەكتيۆالارىن جانە جوعارى تەحنولوگيالىق سالالاردى دامىتۋ ماقساتىندا ءارتۇرلى ەلدەردىڭ ساراپشىلارىنىڭ ءوزارا ءىس-قيمىلىن تالقىلاۋ ءسوز بولعانى ايتىلعان.
قازاقستاندا 6 قازاندا اەس قۇرىلىسىنا بايلانىستى رەفەرەندۋم وتكەن. وندا كوپشىلىكتىڭ اەس قۇرىلىسىن سالۋدى قولداعانى حابارلانعان. ءالى رەسمي ايتىلماعانىمەن، اەس قۇرىلىسىنا قاتىساتىنداردىڭ ءبىرى رەتىندە رەسەي اتالىپ ءجۇر.
