ماڭعىستاۋ وبلىسىنداعى جاڭاوزەندە "وزەنمۇنايگازعا" قاراستى "بۇرعىلاۋ جۇمىستارى باسقارماسى"(بجب) كومپانياسىنىڭ جۇمىسشىلارى ەرەۋىلگە شىقتى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
بجب كومپانياسىنىڭ جۇمىسشىلارى جۇمىستى توقتاتىپ، باسشىلىققا بەس ءتۇرلى تالاپ قويعان. ولار: ومگ زەينەتكەرلەرى مەن دەنساۋلىعىنان ايىرىلعان مۇنايشىلاردىڭ بالالارىن تىكەلەي شتاتقا الۋ، جاڭاوزەن قالاسىندا جۇمىسسىزدىق ماسەلەسىن شەشۋ، ۇجىمدىق شارتتا 2013 دەيىن بولعان دەربەس ەڭبەكاقى تولەۋ جۇيەسىن قايتارۋ، ماشينيستەر مەن وپەراتورلاردىڭ دارەجەسىن كوتەرۋ، 30% قوسىمشا جالاقى ءتارتىبىن تولەۋدى ۇجىمدىق شارتقا ەنگىزۋ.
"ەگەر ءبىز دەربەس ەڭبەكاقى تولەۋ جۇيەسىنە وتسەك، جالاقىمىز وسەدى. مىسالى بىزدەن تابىس سالىعىن جانە وزگە دە سالىق تۇرلەرىن ايلىعىمىزدان ۇستايدى. سونى مەنىڭ تۇسىنىگىم بويىنشا، جاڭا جۇيەگە وتسەك، بىزدەن ۇستامايدى. بىزدەن ۇستالعان سالىق ءبىزدىڭ زەينەتاقى جۇيەسىنە قۇيىلادى" دەگەن نارازىلىققا شىققان جۇمىسشىلاردىڭ ءبىرى عازيز ماحامبەتوۆ ازاتتىق تىلشىسىنە.
ازاتتىقتىڭ حابارلاۋىنشا، 13 قاراشادا "وزەنمۇنايگازعا" قاراستى تاعى ءۇش مەكەمە بجب-نىڭ تالاپتارىن قولداپ، جۇمىسقا شىقپاعان. جەلىدە تاراعان ۆيدەونىڭ بىرىندە ومگ-عا قاراستى مەكەمە جۇمىسشىسى دەلىنگەن ءبىر ادام "بجب تالاپتارىن قولداپ، ءبىر ساعاتقا جۇمىستى توقتاتتىق" دەپ ايتادى. ۆيدەودا جۇمىسشىلاردىڭ عيمارات ىشىندە تۇرعانى بايقالادى.
"بجب-نىڭ باسىندا بار ماسەلە ولاردا دا بار. 32, 33, 35-مەكەمەلەر جۇمىسقا شىقپاپتى. مەن ءوزىم بۇگىن ءبىر مەكەمەگە بارىپ كەلدىم. ولار ءجۇز پايىز شىقپاي تۇرمىز”، - دەدى عازيز ماحامبەتوۆ.
جۇمىسشى عازيز ماحامبەتوۆ ءبىر كۇن بۇرىن كەشكە بجب مەكەمەسىنىڭ ەرەۋىلشىلەرىنە "وزەنمۇنايگازدىڭ" باس ديرەكتورى، كادر ءبولىمىنىڭ جەتەكشىسى، باس ەكونوميست كەلىپ، قىزمەتكەرلەردىڭ تالابىن تىڭداعان. ولار جۇمىسشىلارعا "تالاپتارىڭ زاڭسىز" دەپ ايتقان.
ء"بىز بۇل تالاپتى ايتىپ كەلە جاتقانىمىزعا جەتى اي بولدى، وسى ۋاقىت ارالىعىندا ەشتەڭە وزگەرمەدى. بۇعان دەيىن ءبىزدىڭ جىگىتتەر ءتىپتى استاناعا دەيىن بارىپ، "قازمۇنايگازعا" جازباشا ارىزىمىزدى تاپسىرىپ كەلگەن. قمگ-نىڭ جاڭا باسشىسى بۇل تالاپ دۇرىس ەكەنىن ايتقان" دەيدى عازيز ماحامبەتوۆ.
ازاتتىق راديوسى "بۇرعىلاۋ جۇمىستارى باسقارماسى" مەكەمەسىنە حابارلاسقانمەن ازىرگە جاۋاپ الا الماعان. بۇگىندە مەكەمەنىڭ ديرەكتورى مىندەتىن اتقارۋشى مەڭدىباي قوسجانوۆ جۋرناليستەردىڭ سۇراقتارىنا جاۋاپ بەرمەيتىنىن ايتىپ، تەلەفون تۇتقاسىن قويا سالعانىن ايتادى.
ايتا كەتەيىك، ناۋرىز ايىندا «قازمۇنايگاز» ۇق» اق جۇمىسشىلارى دا ەرەۋىلگە شىققان بولاتىن.
