قاماۋعا الىنعان قازاقستاندىق ايەل اۋرۋحانا پالاتاسىنان توسەك جايمالارىن پايدالانىپ قاشپاق بولعان، دەپ حابارلايدى "ادىرنا" ۇلتتىق پورتالى Zakon.kz-كە سىلتەمە جاساپ.
ول ينسپەكتور-پسيحولوگ، ادىلەت لەيتەنانتى ج. ەسىمدى كۇزەتشىمەن بىرگە پالاتادا بولعان.
«تاڭعى ساعات 4 شاماسىندا ۇستالعان ازاماتشا كۇزەتشىنىڭ ۇيىقتاپ قالعانىن پايدالانىپ، ەكى توسەك جايماسىن جىلىتۋ باتارەياسىنا بايلاپ، تەرەزە ارقىلى سىرتقا شىعىپ، قاشىپ كەتكەن. كەيىن ول ۇستالىپ، قىلمىستىق-اتقارۋ جۇيەسى مەكەمەسىنە قايتا ورنالاستىرىلدى»، – دەپ حابارلايدى جوعارعى سوتتىڭ ءباسپاسوز قىزمەتى.
داۋ تۋعىزعان بۇل وقيعادان كەيىن پالاتا ەسىگىنىڭ الدىندا كەزەكشىلىكتە تۇرعان اعا سەرجانت ر. جۇمىستان بوساتىلعان. ول جۇمىستان بوساتىلۋىنا كەلىسپەي، قاجك-نە قارسى سوتقا قايتا جۇمىسقا ورنالاستىرۋ تۋرالى شاعىم تۇسىرگەن.
جەرگىلىكتى سوتتار ارىزدى قاناعاتتاندىرۋدان باس تارتىپ، جۇمىستان بوساتۋدىڭ زاڭدىلىعىن كورسەتكەنىمەن، جوعارعى سوت ءىستى قايتا قاراپ، سەرجانتتىڭ ارىزىن قاناعاتتاندىردى.
«تالاپكەر (ەركەك) ايەلدى كۇزەتۋگە مىندەتتى ەمەس ەدى. سەبەبى ەرەجە بويىنشا، ەگەر اۋرۋحاناعا كۇدىكتى نەمەسە ايىپتالۋشى ايەل ورنالاستىرىلسا، ونى كۇزەتۋگە ايەل كۇزەتشى تاعايىندالادى. سونىمەن قاتار، قاماۋعا الىنعان ايەلدى كۇزەتۋ بارىسىندا زاڭ بۇزۋشىلىقتارعا جول بەرىلگەن. ول تورى جوق تەرەزەلەرى بار پالاتاعا ورنالاستىرىلعان جانە جەكە ەسىگى بولماعان»، – دەپ ءتۇسىندىردى جوعارعى سوت.
