تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ء(تسدياوم) وتاندىق زىمىران تاسىعىشتىڭ ۇشىرىلىمىنىڭ ەگجەي-تەگجەيلەرىن ايتتى، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
بۇعان دەيىن مينيسترلىك باسشىسى جاسلان ماديەۆ 2025 جىلى قازاقستان عارىشقا تاۋەلسىز قول جەتكىزۋ ءۇشىن وتاندىق زىمىران تاسىعىشتى ۇشىرۋدى جوسپارلاپ وتىرعانىن ايتقان بولاتىن.
ءتسدياوم Tengrinews.kz رەداكتسياسىنىڭ رەسمي ساۋالىنا بەرگەن جاۋابىندا حابارلاعانداي، زىمىراندىق تەحنولوگيالار مەن سوعان بايلانىستى جوبالارعا قاتىستى اقپارات قۇپيا بولىپ سانالادى. دەگەنمەن، كەيبىر مالىمەتتەر ءالى جاريالانادى.
بۇگىندە قازاقستاندا العاشقى سىناق ۇشىرۋ 2025 جىلعا جوسپارلانعان وتاندىق مەتەورولوگيالىق زىمىراندى ازىرلەۋ بويىنشا جوبالاۋ الدىنداعى زەرتتەۋلەر جۇرگىزىلۋدە.
قازىرگى ۋاقىتتا مامانداردا وتىن، كومپوزيتتىك ماتەريالدار جانە باسقارۋ جۇيەلەرى بويىنشا بەلگىلى ءبىر ازىرلەمەلەر بار، ونىڭ نەگىزگى ىشكى جۇيەلەرىن جوبالاۋ جۇمىستارى جۇرگىزىلۋدە.
«مەتەورولوگيالىق زىمىراننىڭ ءساتتى جاسالۋى عارىشقا تاۋەلسىز قول جەتكىزۋ ءۇشىن وتاندىق عارىش زىمىران تاسىعىشىن جاساۋ قۇزىرەتىن الۋعا نەگىز بولا الادى. جالپى، كوممەرتسيالىق ماقساتتاعى زىمىران تاسىعىشتارىن جاساۋ جانە ۇشىرۋدى قارجىلاندىرۋدىڭ قاجەتتى كولەمى الەمدىك تاجىريبەگە سايكەس، شامامەن 50-60 ميلليون دوللاردى قۇرايدى»، - دەپ حابارلادى سالانىڭ ءتيىستى مينيسترلىگى.
مەتەورولوگيالىق زىمىران جوباسى مينيسترلىكتىڭ عىلىمي زەرتتەۋلەرگە ارنالعان ءليميتى شەگىندە قارجىلاندىرىلادى جانە زىمىران تاسىعىشتى ازىرلەۋ مەن جاساۋعا قاجەتتى قاراجات كولەمى جوبالاۋ كەزەڭىنىڭ اياقتالۋىنا قاراي انىقتالادى.
ەستەرىڭىزگە سالا كەتەيىك، تامىز ايىندا قازاقستان مەن قىتاي ايعا ستانتسيا سالادى دەپ حابارلانعان بولاتىن. ەلدەر بىرلەسكەن عىلىمي-زەرتتەۋ بازاسىن سالۋ تۋرالى مەموراندۋمعا قول قويدى.
ايتا كەتەيىك، KazSat-1 عارىش اپپاراتى 2008 جىلى بايلانىستان شىعىپ، جوعالعان بولاتىن. كەيىن 9 جىلدان كەيىن 2017 جىلدىڭ 31 ناۋرىزىندا جەر وربيتاسىندا اينالىپ جۇرگەن ون التى مىڭعا جۋىق جاساندى سەرىكتىڭ ءبىرى – KazSat-2 دە جوعالىپ كەتتى. سونىڭ سالدارىنان عارىشتىق اپپاراتتىڭ رەسۋرستارىن پايدالاناتىن 13 بايلانىس جانە تەلەحابار وپەراتورىنىڭ جۇمىسى ۋاقىتشا توقتاتىلعان.
