ءاربىر اۋە كومپانياسىنىڭ جولاۋشىلار مەن باگاجدى تاسىمالداۋعا قاتىستى ەرەجەلەرى بار. قىزمەتكەرلەر وسى ەرەجەلەرگە سايكەس قىزمەت كورسەتەدى، دەپ حابارلايدى «ادىرنا» ۇلتتىق پورتالى ينفورمبيۋروعا سىلتەمە جاساپ.
7 قاراشا كۇنى قر حالىق ءارتىسى، ءانشى ماقپال ءجۇنىسوۆا دومبىرانى ۇشاق سالونىنا الىپ كىرۋ كەزىندە قيىندىقتارعا تاپ بولعان ەدى. FlyArystan اۋە كومپانياسى ءانشىنىڭ دومبىراسىن تاسىمالداۋعا رۇقسات بەرمەي، وعان قوسىمشا ورىن ساتىپ الۋ قاجەتتىگىن حابارلاعان. اۋە كومپانياسىنىڭ ءباسپاسوز قىزمەتى بارلىق جولاۋشىلار ءۇشىن تاسىمالداۋ ەرەجەلەرىنىڭ بىردەي ەكەنىن مالىمدەدى.
بۇعان دەيىن انشىلەر ەركىن شۇكىمان مەن ەرلان رىسقالي دا, ايتىسكەر اقىن ايشولپان تىلەۋتاي دا وسىنداي وقيعالارعا تاپ بولعان ەدى.
وسىنداي جاعدايلارعا بايلانىستى ينفورمبيۋرو پورتالى قازاقستان اۋماعىندا ۇشاقپەن مۋزىكالىق اسپاپتاردى قالاي تاسىمالداۋ كەرەكتىگىن ءتۇسىندىردى.
FlyArystan كومپانياسى مۋزىكالىق اسپاپتاردى قول جۇگى رەتىندە الىپ جۇرۋگە نەمەسە الدىن الا ساتىپ الىنعان جەكە ورىنعا ورنالاستىرۋدى ۇسىنادى. ەگەر مۋزىكالىق اسپاپتىڭ سالماعى 5 كەلىگە دەيىن بولسا جانە ولشەمى 56x23x36 سانتيمەتردەن اسپاسا، ونى تەگىن تاسىمالداي الادى. ال 5 كەلىدەن 10 كەلىگە دەيىنگى اسپاپتاردى اقىلى تۇردە تاسىمالداۋعا رۇقسات بەرىلەدى، بىراق ونىڭ كولەمى وزگەرىسسىز قالادى. ەگەر اسپاپتىڭ كولەمى قولجۇگى ولشەمدەرىنەن اسىپ كەتسە، جولاۋشىعا قوسىمشا ورىن ساتىپ الۋ ۇسىنىلادى. ورىن الماعان جاعدايدا اسپاپتى جولجۇك بولىمىنە تاپسىرۋ قاجەت. دەگەنمەن مۇنداي جاعدايدا FlyArystan اسپاپتىڭ قاۋىپسىزدىگىنە جاۋاپ بەرمەيدى.
Air Astana كومپانياسى مۋزىكالىق اسپاپتاردى تاسىمالداۋ كەزىندە قوسىمشا جولاۋشى ورنىن ساتىپ الۋدى تالاپ ەتەدى. اسىرەسە، ۆيولونچەل نەمەسە كونتراباس سياقتى ۇلكەن اسپاپتار ءۇشىن بۇل ەرەجە قاتاڭ ساقتالادى. مۋزىكالىق اسپاپتىڭ سالماعى 75 كەلىدەن جانە كولەمى 120x50x30 سانتيمەتردەن اسپاۋى كەرەك. گيتارا نەمەسە ساكسوفون سياقتى شاعىن اسپاپتاردى سالماعى مەن كولەمى ستاندارتتى جولجۇكتىڭ نورماسىنان اسپاسا قول جۇگى رەتىندە الىپ جۇرۋگە بولادى.
Qazaq Air اۋە كومپانياسى ارقىلى مۋزىكالىق اسپاپتاردى تاسىمالداۋ كەزىندە الدىن الا كەلىسىم جاساۋ قاجەت. قول جۇگى رەتىندە 10 كەلىگە دەيىنگى ولشەمدەرى 120x50x30 سانتيمەتردەن اسپايتىن مۋزىكالىق اسپاپتى الىپ جۇرۋگە بولادى. بۇدان ۇلكەن اسپاپتار ءۇشىن قوسىمشا ورىن ساتىپ الۋ تالاپ ەتىلەدى. ال 75 كەلىدەن اساتىن اسپاپتاردى اۋە كەمەسىنىڭ باگاج بولىمىنە تاپسىرۋ قاجەت.
SCAT اۋە كومپانياسى مۋزىكالىق اسپاپتاردى تاسىمالداۋ ءۇشىن الدىن الا كەلىسۋ قاجەتتىگىن مالىمدەدى. ەگەر مۋزىكالىق اسپاپتىڭ كولەمى قول جۇگى ولشەمدەرىنەن اسىپ كەتسە، بىراق 30x40x90 سانتيمەتردەن اسپاسا، ونى قوسىمشا وتىراتىن ورىن الىپ تاسىمالداۋعا بولادى. كولەمى ودان دا ۇلكەن اسپاپتاردى باگاج بولىمىنە تاپسىرۋ كەرەك.
