قۇدايدان دا كۇشتى بولىپ ۋاقىتتى ارتقا ءبىر ساعات سىرعىتا سالدىق.
ەندى قىس ءتۇستى. كەي وڭىردە كۇن تورتتەن اسا باتادى. بەستەن اسا قاراڭعى تۇسەدى.
ەكىنشى اۋىسىمدا وقيتىن بالالار مەكتەپتەن جەتىدەن اسا شىعادى. بۇل كەز تىم قاراڭعى. وقۋشىنىڭ اماندىعىنا، قاۋىپسىزدىگىنە قيىن بوپ تۇر.
ەندى نە ىستەيمىز؟
بىزدە ءبارىن شەشە سالاتىن ءبىر جامان ءۇردىس بار.
- مەكتەپكە بالا سىيماي جاتىر نە ىستەيمىز؟
- ساباق ۋاقىتىن قىسقارتىپ ءۇش اۋىسىمدى جاساڭدار!
- 45 مينۋتتى 40 مينۋتقا تۇسىردىك. ماسەلە «شەشىلدى».
- بۇگىن مەرەكە عوي. نە ىستەيمىز؟
- ءبىر ەكى ساباقتى قىسقارتا سالىڭدار.
- بالالاردىڭ ساباعى بىتكەنشە ءتۇن بولىپ كەتىپ جاتىر، نە ىستەيمىز؟
- ساباق ۋاقىتىن قىسقارتا سالىڭدار!
- 40 مينۋتتى 30 مينۋتقا تۇسىردىك. ماسەلە شەشىلدى.
- مىنە، ماسەلەنىڭ شەشۋ جولىن تاۋىپ ۇيرەنىڭدەر. جوق جەردەن پروبلەما تۋىنداتپاي.
كوپ جەردە ماسەلەنىڭ شەشۋ جولى وسىلاي قالىپتاستى. قازىر كەي مەكتەپتىڭ ءبىر اكادەميالىق ساعاتى 45 مينۋت، كەي مەكتەپتە 40 مينۋت. ەندى مىنا ساعاتتىڭ جىلجىعانىمەن 30 مينۋتتىق ەتە سالايىق دەگەن ۇسىنىستى كورىپ كادىمگىدەي شوشىپ وتىرمىن. بۇل پەداگوگيكالىق ۇستانىم، پەداگوگيكالىق زاڭدىلىق قايدا؟
وتكەندە نەگە 40 مينۋت دەگەن سۇراعىما بىرەۋ 5 مينۋتتىڭ نە ارى بەرىسى بار، وقيتىن بالا 15 مينۋتتا دا وقيدى دەپتى. ەح، ءسويتىپ وقۋ جىلىن دا كەسىپ تاستاپ ەدىك.
اينالايىندار، وقۋ باعدارلاماسى جوسپارلانعاندا ءار ساباق 45 مينۋتقا لايىقتالادى. ءار ساباقتىڭ سالماعى، جۇگى 45 مينۋتقا ارنالادى. مۇعالىم ءۇشىن 5 مينۋت تۇگىلى 5 سەكۋند تا قادىرلى ءھام قىمبات. مۇعالىم 5 مينۋتتا وتە ۇلكەن ماسەلەلەردى شەشىپ ۇلگەرەدى.
ۇلت ۇستازى احمەت بايتۇرسىنۇلى «بالالارعا كوپ ۇيرەتەم دەپ، اسىعىپ شالا-شارپى ۇيرەتۋدەن، از دا بولسا، انىقتاپ نىق ۇيرەتۋ ابزال» دەيدى. الدە ۇلت ۇستازىنىڭ ۇستانىمى دا ويىنشىق پا؟
ۋاقىتتى شەگەرگەن قاتەلىكتى وقۋشىنىڭ ءبىلىم الۋ ۋاقىتىن قىسقارتۋمەن شەشپەڭدەرشى، ءوتىنىش!
بالالار، تولىق، لايىقتى، ساپالى ءبىلىم الۋ كەرەك!
اياتجان احمەتجانۇلى
