اباي وبلىسىندا اۋىل شارۋاشىلىعىن دامىتۋعا باعىتتالعان ينۆەستيتسيالىق جوبالار ءوڭىر ەكونوميكاسىنا سەرپىن بەرىپ، جەرگىلىكتى تۇرعىندار ءۇشىن جاڭا جۇمىس ورىندارىن اشۋعا مۇمكىندىك جاسالدى.
ناقتىراق ايتساق، وتكەن جىلى اگروونەركاسىپتىك كەشەن سالاسىنداعى جوبالارعا نەسيە بەرۋ باعدارلاماسى اياسىندا 2 ءسۇتتى-تاۋارلى فەرماسىن قولداۋ ماقساتىندا 2 ملرد تەڭگە ەكى ءسۇت فەرماسىن ياعني، «قاليحانۇلى» شارۋا قوجالىعى مەن «ورنەك» جشس-نە كەڭەيتۋگە ءبولىندى. شارۋالار بەرىلگەن ينۆەستيتسياعا سيممەنتال جانە گولشتينو-فريز تۇقىمىنان 601 اسىل تۇقىمدى سيىر ساتىپ الدى.
ءوڭىر تۇرعىندارىنا تانىمال بەسقاراعاي اۋدانىنداعى «قاليحانۇلى» شارۋا قوجالىعى رەسەي فەدەراتسياسى مەن چەحيا، اۆستريا مەن گەرمانيا مەملەكەتتەرىنەن جالپى سانى 252 باس اسىل تۇقىمدى ءىرى قارا مال ساتىپ الدى. ال كوكپەكتى اۋدانىنداعى «ورنەك» جشس گەرمانيادان سيممەنتال تۇقىمدى جالپى سانى 349 باس 18 ايلىق قۇناجىندار اكەلدى. جوبالاردىڭ ىسكە قوسىلۋىمەن 2025 جىلدان باستاپ ءسۇت ءوندىرىسى جىلىنا 2 400 تونناعا ارتپاق.
سونداي-اق، شارۋاشىلىقتاردىڭ وندىرىستىك قۋاتىن ارتتىرۋ ءۇشىن قازىرگى زامانعى تەحنيكا جانە جابدىقتارمەن قامتاماسىز ەتىلدى.
مىسالى، «قاليحانۇلى» شارۋا قوجالىعى زاماناۋي استىق تاسۋشى ساموسۆال، 6135ۆ ماركالى تراكتور، John Deere 7250 ماركالى جەمشوپ جينايتىن كومباين جانە كوپتەگەن باسقا دا قاجەتتى تەحنيكالارعا قول جەتكىزدى. ال «ورنەك» جشس تراكتورلار مەن استىق جينايتىن كومبايندارمەن قاتار مال شارۋاشىلىعىنا قاجەتتى كوپتەگەن جابدىقتى ساتىپ الدى.
ايتا كەتەلىك، مارات قالىقوۆ باسقاراتىن «قاليحانۇلى» شارۋا قوجالىعى «ايشا» ساۋدا بەلگىسىمەن تانىمال بولعان ءسۇت تسەحى بۇگىندە 17 ءتۇرلى ءسۇت ونىمدەرىن شىعارىپ، جەرگىلىكتى نارىقتا سۇرانىسقا يە. قالىقوۆ كاسىپتى 90-جىلدارداعى داعدارىس كەزەڭىندە باستاپ، قازىردە مىڭعا جۋىق ءىرى قارا مال جانە جىلقى، تۇيە وسىرۋدە.
– ينۆەستيتسيالاردىڭ ارقاسىندا ءوندىرىسىمىزدىڭ قۋاتى 9 تونناعا دەيىن ءوستى. جاڭا تەحنيكا مەن تەحنولوگيالار ەنگىزىلىپ، قازىر 170 ادام جۇمىسپەن قامتىلعان، – دەيدى مارات قالىقوۆ.
اتالعان شارۋالار الداعى ۋاقىتتا مال باسىن كوبەيتۋ ماقساتىندا قوسىمشا قورا-جايلار سالىپ، ءسۇت ءونىمىن ارتتىرۋدى، سونداي-اق حالىقتى تابيعي جانە ساپالى ءسۇت ونىمىمەن قامتۋ جوسپارلارىن جۇزەگە اسىرماق.
