يسپانيادا سۋ تاسقىنى سالدارىنان 150-دەن استام ادام قازا تاپتى. بۇل يسپانيادا سوڭعى 1973 جىلدان بەرگى بولىپ تۇرعان ەڭ اۋىر سۋ تاسقىنى، دەپ حابارلايدى “ادىرنا” ۇلتتىق پورتالى ۆۆس-گە سىلتەمە جاساپ.
بەيسەنبىدە زارداپ شەككەن ايماقتاردى ارالاعان پرەمەر-مينيستر پەدرو سانچەس: «قازىر ەڭ باستىسى - مۇمكىندىگىنشە كوپ ادامنىڭ ءومىرىن ساقتاپ قالۋ»، - دەدى.
ۆالەنسيا اۆتونوميالىق بىرلەستىگىندە كەم دەگەندە 155 ادام، كاستيليا-لا-مانچادا تاعى ەكى ادام جانە اندالۋسيادا ءبىر ادام قايتىس بولدى.
ۆالەنسيانىڭ وڭتۇستىك-باتىسىنداعى پايپورتا مۋنيتسيپاليتەتىندە وزەن ارناسىنان اسىپ كەتكەن جەردە كەم دەگەندە 40 ادام قازا تاپتى.
«ءبىز ءبارىمىز قازا بولعان ادامدى بىلەمىز. بۇل قورقىنىشتى ءتۇس»، - دەدى فارماتسەۆت ميگەل گەرريللا ۆۆس-گە.
شەنەۋنىكتەر ءىز-ءتۇزسىز جوعالعانداردىڭ ناقتى سانىن ايتپاعانىمەن، ولاردىڭ كوپ ەكەنىن ايتۋدا.
يسپانيا كورولى فەليپە VI توتەنشە جاعداي ءالى اياقتالماعانىن ەسكەرتتى جانە پرەمەر-مينيستر سانچەس ازاماتتاردى مۇمكىندىگىنشە ۇيدە بولۋعا جانە توتەنشە جاعدايلار قىزمەتىنىڭ كەڭەستەرىن ورىنداۋعا شاقىردى.
جۇزدەگەن ادام سۋ تاسقىنىنان زارداپ شەككەن اۋداندارداعى ۋاقىتشا باسپانالارعا ورنالاستىرىلدى.
ۆالەنسيانى يسپانيانىڭ باسقا قالالارىمەن بايلانىستىراتىن بىرنەشە جولدار مەن تەمىرجول جەلىسى سال كۇيىندە قالدى.
عالىمدار پلانەتانىڭ كليماتىنىڭ وزگەرۋى ەكسترەمالدى مەتەورولوگيالىق قۇبىلىستاردىڭ ۇزاقتىعىن، جيىلىگىن جانە قارقىندىلىعىن ارتتىرىپ، ولاردىڭ بولجاۋ مۇمكىن ەمەستىگىن ايتادى.
بەيسەنبى كۇنگى World Weather Attribution عالىمدار توبىنىڭ مالىمدەۋىنشە، وسى اپتادا يسپانيادا جاۋعان جاۋىن-شاشىن جاھاندىق جىلىنۋعا دەيىنگىدەن 12 %-عا، ياعني ەكى ەسە كوپ بولدى.
جەرگىلىكتى تۇرعىندار توتەنشە جاعدايلار تۋرالى ەسكەرتۋ جۇيەلەرىنىڭ جەتكىلىكتىلىگىنە جانە ۇكىمەتتىڭ ارەكەت ەتۋ جىلدامدىعىنا كۇمان كەلتىردى.
ازاماتتىق قورعانىس جانە توتەنشە جاعدايلار ديرەكتسياسى (DGPCE) سەيسەنبى كۇنى ساعات 20:15-تە دابىل قاققانى تۋرالى حابارلاندى - سول ۋاقىتتا ۆالەنسيانىڭ بىرنەشە ايماعى بىرنەشە ساعات بويى سۋ استىندا قالعان.
