ۇشجاقتى مەموراندۋمعا قول قويىلدى

جيىنعا «قازمۇنايگاز» ۇك» اق باسقارما توراعاسى اسحات حاسەنوۆ، ەنەرگەتيكا ۆيتسە-ءمينيسترى ارىمبەك قۇدايبەرگەن، قىتايلىق «CNPC» كومپانياسىنىڭ ۆيتسە-پرەزيدەنتى چجان داوۆەي قاتىستى.

باسقوسۋدا ايماق باسشىسى نۇرلىبەك نالىباەۆ سەمينارعا قاتىسۋشىلارعا ساتتىلىك تىلەپ، سىر ءوڭىرىنىڭ الەۋمەتتىك-ەكونوميكالىق دامۋىنداعى مۇناي كومپانيالارىنىڭ ۇلەسىن اتاپ ءوتتى.

بۇگىندە يگەرىلگەن كەن ورىندارىنىڭ كوپشىلىگى ءوندىرىستىڭ سوڭعى ساتىسىنا شىققان. قولدانىستاعى مۇناي كەنىشتەرىنىڭ تابيعي سارقىلۋىنا بايلانىستى 2013 جىلدان بەرى مۇناي ءوندىرۋ كولەمى شامامەن 65%-عا قىسقاردى. سوندىقتان، وڭدەۋ ونەركاسىبىن دامىتۋ ارقىلى ءوڭىر ەكونوميكاسىن ءارتاراپتاندىرۋ جۇمىستارى قولعا الىندى. وسىلايشا مۇناي قورىنىڭ سارقىلۋى سالدارىنان سوڭعى 10 جىل بويى تومەندەۋ تەندەنتسياسىن كورسەتىپ كەلگەن ونەركاسىپ ءوندىرىسى وتكەن جىلدىڭ قىركۇيەك ايىنان باستاپ وڭ ديناميكاعا شىقتى.

سالانىڭ دامۋى وتاندىق مۇناي-سەرۆيستىك كومپانيالاردىڭ دامۋىنا جول اشتى. ايماقتا قالىپتاسقان مۇناي-سەرۆيستىك بەلدەۋ قانشاما وتباسىنىڭ وسى سالادان تابىس تابۋىنا مۇمكىندىك بەرۋدە.

بۇگىندە مۇندا 10 مىڭنان استام ادام جۇمىسپەن قامتىلعان. جالپى العاندا، وبلىستىڭ ونەركاسىپ وندىرىسىندە مۇناي-گاز سالاسىنىڭ ۇلەسى شامامەن 50%-دى قۇرايدى. وڭدەۋ سالاسىنداعى ءوسۋ قارقىنى بويىنشا وبلىس 2022 جىلى رەسپۋبليكادا 11-ورىندا بولسا، بيىلدان باستاپ ءبىرىنشى ورىندا.

ەكونوميكا سالالارىندا، اسىرەسە ينۆەستيتسيا تارتۋ، قۇرىلىس سالۋ، ساۋدا اينالىمى، كولىك قىزمەتى، اۋىل شارۋاشىلىعىندا جۇرگىزىلگەن جۇيەلى جۇمىستاردىڭ ارقاسىندا بۇگىندە وبلىس ەكونوميكالىق دامۋ قارقىنى بويىنشا وڭىرلەر اراسىندا كوشباسشى پوزيتسياسىندا. مۇناي كومپانيالارى ايماقتاعى بىرقاتار الەۋمەتتىك ماسەلەلەر مەن جوبالاردى شەشۋگە قولداۋ كورسەتۋدە. سوڭعى 10 جىلدا ءوڭىردىڭ الەۋمەتتىك-ەكونوميكالىق دامۋىنا 17 ملرد. تەڭگەگە جۋىق قارجى ءبولدى.

كەزدەسۋ سوڭىندا وبلىس اكىمدىگى، قر ەنەرگەتيكا مينيسترلىگى، «قازمۇنايگاز» ۇلتتىق كومپانياسى سۇيىتىلعان مۇناي گازىن وڭدەۋ قوندىرعىسىنىڭ جىلدىق قۋاتتىلىعىن 2025 جىلدان باستاپ الداعى 10 جىل ىشىندە 120 مىڭ تونناعا دەيىن ارتتىرۋعا باعىتتالعان ۇشجاقتى مەموراندۋمعا قول قويدى.