تۇركيالىق Baykar Defence كومپانياسى قازاقستاندا كاميكادزە-دروندار مەن ۇشقىشسىز ۇشاتىن اپپاراتتار شىعارۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستاننىڭ قورعانىس مينيسترلىگىنىڭ ءباسپاسوز قىزمەتى جاريالادى.
قورعانىس ءمينيسترى رۋسلان جاقسىلىقوۆ Baykar Defence كومپانياسىنىڭ باس ديرەكتورى حالۋك بايراكتارمەن كەلىسىمگە كەلدى.
"Baykar Defence باس ديرەكتورى حالۋك بايراكتارمەن كەلىسسوزدەر ناتيجەلى بولدى. كەلىسسوزدەر بارىسىندا تاراپتار ەلىمىزدىڭ اۋماعىندا تاكتيكالىق ۇشقىشسىز ۇشۋ اپپاراتتارى مەن جەدەل دەڭگەيلى وق-دارىلەردى ءوندىرۋدى لوكاليزاتسيالاۋ ماسەلەسى بويىنشا جول كارتاسىن ازىرلەۋگە كەلىستى", – دەلىنگەن مينيسترلىك حابارلاماسىندا.
كەلىسسوز تۇركيانىڭ ستامبۋل قالاسىندا وتكەن SAHA EXPO-2024 IV حالىقارالىق قورعانىس جانە اەروعارىش ونەركاسىبى كورمەسى اياسىندا بولعانى ايتىلدى. مينيستر جاقسىلىقوۆ تۇركيانىڭ قورعانىس ءمينيسترى ياشار گۇلەرمەن، قورعانىس ونەركاسىبى اگەنتتىگىنىڭ توراعاسى حالۋك گەرگيۋنمەن جانە ءباا قورعانىس ءمينيسترى مۇحاممەد بەن مۇباراك فادەل ءال مازرۋيمەن كەلىسسوزدەر جۇرگىزدى.
