قالا كۇنى قارساڭىندا سىر ەلىندە بىرقاتار الەۋمەتتىك نىسان ەل يگىلىگىنە تابىستالدى. سونىڭ ءبىرى – ۇستەل تەننيسى ورتالىعى.
وبلىس اكىمى نۇرلىبەك نالىباەۆ جاڭا ورتالىقتىڭ سالتاناتتى اشىلۋ راسىمىنە قاتىسىپ، قالا تۇرعىندارىن قۇتتىقتادى.
مەرەكەلىك ءىس-شاراعا «سامۇرىق-قازىنا» اق باسقارۋشى ديرەكتورى عيبرات اۋعانوۆ، جاۋاپتى سالالاردىڭ، قۇقىق قورعاۋ ورگاندارىنىڭ باسشىلارى، حالىقارالىق قارتتار كۇنى قارساڭىندا ايماق باسشىسىنىڭ ارنايى شاقىرتۋىمەن بارلىق اۋداننان كەلگەن ارداگەرلەر، زيالى قاۋىم وكىلدەرى قاتىستى.
«بۇگىن ەل يگىلىگىنە بەرىلگەن ۇستەل تەننيسى ورتالىعى سىر سپورتىنا جاڭا سەرپىن اكەلىپ، جەڭىمپازدار سىيلايدى دەپ سەنەمىز. سۇيىكتى قىزىلوردامىزدىڭ كەلبەتىنە كورىك قوساتىن اسەم عيماراتتاردىڭ قاتارىن تولىقتىرعان ورتالىقتىڭ قولدانىسقا بەرىلۋى بارشاڭىزعا قۇتتى بولسىن!
وبلىستىڭ قارقىندى دامۋىنا قاجەتتى الەۋمەتتىك نىسانداردىڭ سالىنۋىنا زور ۇلەس قوسقان «سامۇرىق-قازىنا» اكتسيونەرلىك قوعامى ديرەكتورلار كەڭەسىنىڭ مۇشەسى، باسقارما توراعاسى جاقىپوۆ نۇرلان قارشىعاۇلىنا جانە «سامۇرىق-قازىنا تراست» كورپورتيۆتىك قورىنىڭ باس ديرەكتورى اديەۆا الفيا داۋلەتقاليقىزىنا سىر جۇرتشىلىعى اتىنان ريزاشىلىق بىلدىرەمىن. سونىمەن قاتار، ورتالىقتىڭ قۇرىلىسىن ساپالى جۇرگىزگەن «دانەكەر» جاۋاپكەرشىلىگى شەكتەۋلى سەرىكتەستىگىنە العىس ايتامىز. ەلىمىزدىڭ كوك بايراعى ءدۇبىرلى دودالاردا بيىكتە جەلبىرەپ، سپورتشىلارىمىز جەڭىس تۇعىرىنان كورىنسىن!»، – دەدى نۇرلىبەك ماشبەكۇلى.
ءىس-شارادا «سامۇرىق-قازىنا» اق باسقارۋشى ديرەكتورى عيبرات اۋعانوۆ، وبلىستىق ۇستەل تەننيسى فەدەراتسياسىنىڭ توراعاسى، قازاقستاننىڭ ەڭبەك ەرى ابزال ەراليەۆ، قىزىلوردا وبلىسىنىڭ قۇرمەتتى ازاماتى سامۇرات يماندوسوۆ ءسوز سويلەپ، يگى تىلەك ءبىلدىردى. مەردىگەر «سك دانەكەر» جشس قۇرىلىسشىلارى وبلىس اكىمىنىڭ العىس حاتىمەن ماراپاتتالدى.
حالىقتىڭ سۇرانىسىنا سايكەس ۇستەل تەننيسى ورتالىعىن سالۋعا وبلىستىق بيۋدجەتتەن 2,5 ملرد تەڭگە ءبولىنىپ، قۇرىلىس بيىل باستالدى. وعان «Samruk Kazyna Trust» الەۋمەتتىك جوبالاردى دامىتۋ قورى 900 ملن تەڭگە قارجى ءبولدى. ورتالىقتا 16 ۇستەل تەننيسى ورنالاسقان ويىن الاڭى، 350 كورەرمەنگە ارنالعان ورىندار، جاتتىعۋ زالى مەن اكىمشىلىك بولمەلەر بار. مۇندا 31 قىزمەتكەر جۇمىس جاسايدى.
