بۇگىن پرەزيدەنت قاسىم-جومارت توقاەۆ پرەمەر-مينيستر ولجاس بەكتەنوۆتى قابىلدادى. بۇل تۋرالى اقوردا مالىمدەدى، دەپ حابارلايدى ”ادىرنا” ۇلتتىق پورتالى.
«بيىل قاڭتار-تامىز ايلارى ارالىعىندا ەكونوميكانىڭ ءوسىمى 3,7 پايىزدى قۇراعان. اۋىل شارۋاشىلىعىن جەڭىلدىكپەن قارجىلاندىرۋ كولەمى 3 ەسە ۇلعايىپ، 580 ميلليارد تەڭگەگە جەتكەن. بۇگىندە ەلىمىز بويىنشا ءداندى جانە بۇرشاقتى داقىلدار القابىنىڭ 70,2 پايىزى جينالىپ، 17,2 ميلليون توننا استىق باستىرىلعان»، - دەگەن ەسەبىندە ولجاس بەكتەنوۆ.
پرەمەر-مينيستر پرەزيدەنتتى ەلىمىزدىڭ وڭىرلەرى جىلۋ بەرۋ ماۋسىمىنا 98,3% دايىن دەپ سەندىردى.
«الەۋمەتتىك نىسانداردىڭ دايىندىعى جوعارى دەڭگەيدە. تۇرعىن ۇيلەردى جىلىتۋ ماۋسىمىنا ازىرلەۋ جۇمىستارى 98,3 پايىزعا ورىندالعان. ەلەكتر ستانتسيالارىنا جىل سايىن 60 ميلليون توننا كومىر قاجەت. قازىر ونىڭ قاجەتتى قورى بار»، - دەپ حابارلاعان بەكتەنوۆ.
سونىمەن قاتار، پرەمەر-مينيستر توقاەۆقا سۋ تاسقىنى سالدارىن جويۋ جونىندەگى بۇعان دەيىن بەرىلگەن تاپسىرمالارىنىڭ ورىندالۋ بارىسى مەن كەلەسى جىلى سۋ تاسقىنى جاعدايىنىڭ الدىن الۋ شارالارى تۋرالى ايتىپ بەرگەن.
«زارداپ شەككەندەردىڭ بارلىعىنا الەۋمەتتىك قولداۋ كورسەتىلىپ، بۇلىنگەن دۇنيە-مۇلكى ءۇشىن وتەماقى تولەنگەن. باسپاناسىنان ايىرىلعان ءۇشىن 5767 تۇرعىن ءۇي ساتىپ الىندى جانە 2576 جاڭا ءۇي سالىنعان. اقمولا مەن باتىس قازاقستان وبلىستارىنداعى 104 نىساندا جۇمىس اياقتالۋعا جاقىن»، - دەدى بەكتەنوۆ.
مەملەكەت باسشىسى ەلىمىزدىڭ ونەركاسىپ الەۋەتىن ودان ءارى ارتتىرۋ جانە ينفراقۇرىلىمدى جاڭعىرتۋ جونىندە بىرقاتار تاپسىرما بەردى.
